Taste of Belgium Restaurant ta cera porta definitivamente

ORANJESTAD – Despues di ta opera pa 23 aña na Aruba, Taste of Belgium, un di e restaurantnan mas popular riba nos isla, ta cera su porta debi na bancarota. Asina su doñonan a informa diasabra (awe) na nan proveedornan. Den e carta, nan ta splica cu mientras cu nan tabatin basta problema ultimo tempo caba, COVID-19 a caba daña tur cos, te na e punto cu mester a declara bancarota y cera porta. 

PROBLEMA ANTERIOR Y COVID-19

E restaurant no ta operando desde 16 di maart 2020, y tabata e intencion pa habri bek mas liher posbel, pero e situacion di lockdown extenso, a pone cu e “negoshi di e restaurant no ta mustra briyante pa resto di aña”, nan ta bisa den e carta. Ultimo añanan nan a confronta basta reto caba, cu e.o. mucho cambio di gerente di e centro comercial (Palm Plaza), poco trafico di hende y otro negoshi, mas y mas impuesto di gobierno, y tambe hasta e hecho cu a bin cu tokens pa parkeer, tur esaki a pisa hopi riba e operacion. Pero cu e lockdown, tur cos a bira simplemente imposibel, segun e doñonan. “Tur esaki a resulta den pidi bancarota obligatoriamente”. Segun e doñonan no por a imagina esaki pero el a sosode y no ta den nan man. A gradici e provedoornan pa e 23 aña di servicio.

REACCION

Unabez cu e noticia a plama riba rednan social diasabra, e reaccion tabata grandi di hendenan cu ta(bata) nan cliente. Hopi hende tin recuerdonan specifico pa diferente motibo cada uno. Tabata un hecho si cu e restaurant tabata uno hopi gusta pa tanto local como turista. Den pasado nan a opera CILO’s tambe pero despues a bende esaki na Renaissance Marketplace.