Preparando pa cuminsa cu benta di klapchi awe ainda

ORANJESTAD – Un total di 24 container di klapchi tabata wordo descarga awe mainta trempan, y distribui pa e 94 sitionan di benta na Aruba. Ta un container mas cu normal y 16 lugarnan extra di rebendedor, compara cu aña anterior. Como tal pa merdia, ainda varios establecimento no tabata cla ainda pa habri. Hopi tabata te hasta den preparacion di nan lugar pa haci esaki apto pa e benta por tuma lugar. Algun lugar cu NoticiaCla.com a bishita, net a haya nan cargamento y tabata prepara pa sortia y habri nan lugar despues di merdia pa atardi. E control mes di comision di vuurwerk ta cuminsa mayan, diadomingo. Normalmente ya pa mainta di 27, lugarnan a haya nan stock caba y ta cuminsa bende. E biaha aki nan no tabata cla y tabata ainda transportando klapchi di e deposito di Wela, pa e rebendedonan. E reparticion aki a cuminsa awe mainta 6’or.

PREPARANDO

Un di e rebendedonan a bisa NoticiaCla.com cu nan a kere cu pa 10’or nan lo tabatin nan mercancia. “Nos ta bay haye si, pero nan ta laat. Ta hopi container tin” e doño di un di e lugarnan a bisa. E tabata sinta ta prepara electricidad pa por bende anochi tambe. Despues e la sera su lugar y bay su supermercado bek, en espera pa atardi e por bende klapchi. Un otro establecimento ainda tabata curu. ‘Nos ta preparando pa ora cu nan yega mas laat’, un persona di un establecimento dilanti ex Codemsa, a bisa NoticiaCla.com. Nan tabata chapi e yerba dilanti e container ainda diasabra mainta. “Pa atardi nos ta cla pa cuminsa bende” e persona a sigura NoticiaCla.com. Un otro rebendedor, na Tarabana, tabata hopi ocupa bahando y sortiando e surtido di klapchi cu e si a caba ricibi. For di eynan, un truck chines a continua pa su siguiente ‘cliente’ cu tabata warda klapchi. Asina lo sosode practicamente henter dia te ora cu tur e e rebendedonan haya nan surtido pidi. Pa atardi, ta spera cu tur lo por keda cla.

CONTROL

Mientrastanto for di vocero suplente di polis Liliana Rasmijn, NoticiaCla.com a compronde cu envez di awe, e comision di vuurwerk, di cual nan ta forma parti, lo cuminsa nan control. “Dia 28 nos ta cuminsa controla” Rasmijn a bisa. “Diasabra ainda no pasobra nan lo ta bezig ta stock e lugarnan. E afspraak ta 28”. E comision ta consisti di entre otro polis, brandweer, dti, dow y hendenan di salud. Ora cu nan controla, nan ta busca materialnan cu no ta permiti pa bende, controla si e establecimento ta cumpli cu e reglanan di seguridad, y algun asunto mas. Si nan mira cu e establecimento no ta cumpli, nan por sera e lugar temporalmente of definitivo, of simplemente tuma mercancia ‘illegal’ for di nan y laga nan sigui bende loke si nan tin permiso pa bende. E orario di benta ta for di mainta tempran te anochi 9’or. Y e ultimo dia di benta, ta 31 di december. E ultimo dia pa tira klapchi, ta 1 di januari pa 9’or di anochi.