Hulanda no a tuma decision awe riba fiansa pa Aruba

DEN HAAG – Contrario na loke cu gobierno di Aruba a bisa awe mainta, Hulanda (ainda) no a aproba e fiansa pa crisis di COVID-19. For di Hulanda, secretario di estado Hulandes Raymond Knops a confirma cu e decision no a wordo tuma. Loke a sosode ta cu ora cu Hulanda a presenta e islanan cu e condicionan pa cu e fiansa, tur tres minister plenipotenciario a pidi mas tempo, pa bay reuni cu nan respectivo gobierno. Segun Knops, a palabra e ora cu otro siman diaranson lo bin bek pa e ora e decision cay. Pues no ta asina cu Hulanda a aproba e suma pa Aruba (caba). Esaki por sosode, mas sigur pero otro siman. No ta prome biaha cu ta sosode cu ta bisa algo di e conferencia di prensa, mientras despues ta resulta algo otro ora cu e secretario Hulandes papia. 

XIOMARA MADURO

For di e minister di Finanza Xiomara Maduro, el a splica noticiacla.com merdia cu loke a pasa ta cu Aruba a bay di acuerdo cu e condicionan caba. Hulanda a condiciona e fiansa, y si Aruba bay di acuerdo, cu esaki lo por keda aproba. Pero no ta asina cu awe mainta Hulanda a aproba esaki. Pero gobierno di Aruba a interpreta e asunto diferente. “Kier men pa anos, e decision ta tuma caba pa cu Aruba (cu Hulanda lo aproba e fiansa:red) ” Maduro a bisa, indicando e ora cu ta despues di e reunion di RMR, Aruba lo mester a dicidi mesora cu nan ta bay di acuerdo cu e condicion, ora cu e minister plenipotenciario a bin cu e oferta di RMR. Esey ta pone cu Aruba ta sali di e punto di bista cu pa nan, e decision ta tuma caba y cu Hulanda lo aproba e fiansa. Pero no ta asina si cu awe gobierno di Hulanda a aproba e fiansa. 

AWE MAINTA

Awe mainta, loke cu gobierno a presenta, tabata algo otro. Awe mainta gobierno a manda un comunicado (cu e portal aki a publica tambe), cu tabata bisa cu Hulanda a aproba e di tres ‘zachte lening’ pa Aruba desde cu e crisis Covid-19. E biaha aki pa 113.3 miyon florin pa e periodo di 15 di mei pa 3 di juli. E placa aki ta destina pa e proyectonan di FASE, subsidio di salario y cierto gastonan di Gobierno. Mara na dje tin un cantidad di condicion.  Pero despues for di vocero di oficina di secretario Knops, e vocero a desmenti esaki. “No a cay ningun decision awe!”. A bin e confusion si tabata nifica pa ken specifico e decision no a cay, pasobra tabata papia di tres isla Aruba, Corsou y Hulanda. Riba e pregunta specifico, ora cu e portal aki a puntra, ‘Pues pa Aruba tampoco”, e contesta tabata ‘No”, esta cu pa Aruba tampoco tabatin un decision. 

DIARANSON AWOR

Pues ta diaranson awor Hulanda lo dicidi formalmente riba e islanan. Corsou su media si a raporta mesora cu nan no a haya un decision ainda pasobra mester di mas tempo. Scucha e declaracion di e secretario di estado Hulandes Raymond Knop AKI.  NOTA: E audio ta cortesia di N.O.S.