Bondad di un homber a termina den su detencion inhusto na Playa

ORANJESTAD – Un homber cu a bay yuda un dama turista di bapor crucero, a haye den un problema cu na final a hasta causa su detencion. E homber latino aki, tabata wardando su casa traha na de Palm Island awe tardi, ora cu e la wordo aserca pa un dama turista cu a pidi’e un lift pa e bapor crucero den waf. E urgencia segun e dama, ta cu sino e lo a perde e bapor aki. Segun e homber su version, inicialmente e la nenga e dama, pa motibo cu e tabata ocupa cu su casa caba. E dama turista dado momento a cuminsa yora dilanti di e homber, pidiendo e pa porfabor hiba e y su yiu toch. Esey a pone e homber cambia di pensamento. Despues di a informa su casa di e ‘cambio di plan’, e homber a bay di acuerdo pa hiba e dama aki.

Sinembargo, na caminda e turista a cuminsa informa e homber cu e caminda cu e tabata bayendo ta robes y lo a bira histerico. E homber, cu no tabata domina e idioma ingles, a para un caminda pa e por haya e traduccion di e dama. Aki e dama a dicidi di haci un denuncia di secuestro, esta cu e tine contra su boluntad pa mas di 2 ora caba. E persona cu a yuda cu e traduccion lo a yama polis, y a sigui persecusion di e homber aki. Polis a intercepta e pickup na altura di The Cinemas, y a bay pa detene e homber mesora. Na warda di polis, e dama turista a cambia su version y a bira ombeschoft cu e polisnan. A hiba e dama e cruise terminal, unda cu a bin compronde di e official di bapor, cu e dama no ta mucho bon di cabes. Polis a laga e homber en cuestion den libertad mesora, ya cu e tabata inocente y ta yuda e kier a yuda e turista cu su yiu.

Mientrastanto prome cu e version corecto a sali, medionan (incluyuendo NoticiaCla.com) a raporta inicialmente cu e homber lo a ‘secuestra’ un turista y su yiu riba di dos dia di pasco na Aruba. Esaki pasobra asina e ‘melding’ a drenta y ora cu e reporteronan a acudi na e sitio, a continua cu e detencion di e homber. Pero na final, polis a revisa y adapta e version y a informa corectamente kico realmente a sosode.