Emisora na Corsou a suspende periodista pa motibo di conferencia di prensa

WILLEMSTAD – Na Corsou un radio emisora a suspende su trahado periodista pa supuesto comportacion incorecto durante un conferencia di prensa riba coronavirus. Radio Hoyer a informa su trahado Rick Hart cu e ta suspendi, pendiente informacion di kico a pasa diahuebs merdia durante un conferencia di prensa. Akinan e periodista lo tabata ‘sin respet’ pa prome minister Eugene Rhuggenaath, y esaki lo no a cay den bon tera cerca su doño di trabou. Hart lo kier a haci preguntanan diferente di e supuesto tema di e conferencia. 

E CASO

E conferencia a wordo anuncia cu e topico di e normal nobo. Y e formato tabata uno digital, di forma cu periodistanan por a haci pregunta den forma di video live pa e invitadonan, den e caso aki e.o. prome minister Rhuggenaath. Na comienso di e conferencia, e moderador Favell Maduro a anuncia cu e tema lo ta reapertura di scolnan na Corsou. Sinembargo ora di pregunta, tres periodista, (tur hulandes) a opta pa puntra e prome mandatario riba (segun nan e tema mas solicita) pago di loontrede y vacantie uitkering. Esaki pasobra tabatin un bay bin si ta paga esaki of no. E premier a dicidi toch di contesta e pregunta, y ora cu a bin pa e di dos pregunta, riba un otro tema riba asunt di refineria y e cumprado nobo Klesh, cu tampoco tabata riba e tema di enseñansa, Maduro a dicidi di hala su atencion, y e ora Hart a dicidi cu e no ta interesa mas y a laga bay. E forma  di proceder di Hart durante e conferencia aparentemente no a cay den bon tera, pa cual e doño di trabou a suspende.