Wever: No ta multa mayor si yiu no bay scol otro siman ora cu e habri

ORANJESTAD – No ta intencion pa multa mayornan si nan yiunan no bay scol ora cu esaki cuminsa habri otro siman. Asina prome minister Evelyn Wever a anuncia diaranson anochi durante e briefing riba coronavirus. Esaki ta e contesta pa noticiacla.com riba e hecho cu tin hopi mayor cu ainda tin miedo pa manda nan yiu(nan) scol, aunke cu esaki ta poni pa cuminsa habri otro siman. E hecho cu tin leerplicht ta pone cu normalmente por multa un mayor pa e mucha su ausencia na scol. Den e caso aki, sinembargo, esey lo (ainda) no sosode. 

E SITUACION

Segun Wever, manera cu a anuncia caba, lo cuminsa cu habrimento di scol otro siman dialuna (18 di mei 2020), y no tin ningun hustificacion pa no tin scolnan cera (mas). E siman eynan ainda tur scol ta bay tin chens pa prepara nan mes. “En todo no por tin multa ni nada” Wever a sigura e portal. Cada scol lo contact e mayornan pa asina convence y splica e mayornan kico nan (e scolnan) ta haciendo pa mantene nan yiunan safe y sigur. “Mi ta sigur cu e ora lo no tin mucho problema mas”, Wever a contesta, indicando cu e ora lo no mester tin e problema di miedo pa muchanan bay scol, y consecuentemente ta elimina e problema di ‘ausencia’, cu chens pa multa. 

NO CONVENCI

Asina mes, no ta mucho sigur cu si no obstante e parti ey, si ainda e mayor no ta convenci y no ta laga su yiu(nan) bay scol despues, si esaki tin consecuencia pa tanto e mayor como yiu. E situacion di haci pregunta awor ta ‘fastioso’, ya cu prensa ta permiti solamente dos pregunta via whatsapp, y no tin e posibilidad pa haci pregunta adicional pa posibel clarificacion, pues ta keda e duda riba e contesta completo, manera tabata e caso riba e tema aki.