WHO: Coronavirus COVID-19 porta lo nunca disparce

GINEBRA – E actual coronavirus (COVID-19) porta nunca lo disparce. Esaki a keda bisa durante un briefing di e organisacion mundial di salud (WHO) diaranson, unda cu e director di emergencia a alerta contra intentonan pa pronostica ki ora e virus por disparce. El a añadi cu si haya un vacuna mes, controlando e virus lo ta un esfuerso masivo. 

E REALIDAD

E realidad ta cu casi 300 mil hende mundialmente a muri di coronavirus y mas di 4.3 miyon caso a keda registra. Nacionan Uni mientrastanto ta alerta cu e pandemia tabata causa angustia y salud mental, particularmente den paisnan cu no a inverti suficiente den salud publico. Nacionan Uni a urgi gobiernonan pa considera salud mental como nan reacciona general. 

KICO WHO A BISA

“Ta importante pa pone esaki riba mesa. E virus aki lo por bira djis un otro virus endemic den nos comunidad, y e virus aki porta nunca lo disparce” dr Ryan a bisa den e conferencia di prensa virtual. “HIV no a disparce – pero nos a yega na conforma cu e virus”. Segun dr Ryan, e no ta kere un hende por pronostica ki tempo e virus por disparce. Tin mas di 100 vacuna den desaroyo, pero tin varios malesa manera sarampi cu ainda no a keda elimina no obstante cu tin vacuna pe.  E director general di WHO,  Tedros Adhanom Ghebreyesus a bisa si cu tabata posibel ainda pa controla e virus, cu esfuerso. “E trayectoria ta den nos man y ta trabou di tur hende, y nos tur mester contribui pa para e pandemia”. Epidemiologo di WHO, Maria van Kerkhove  tambe a bisa cu nos mester tin e mentalidad cu e lo tuma basta tempo prome cu nos sali di e pandemia aki.