Wever: Scolnan ta cuminsa habri bek dia 18 di mei proximo

ORANJESTAD – E prome grupo di scol lo habri 18 di mei proximo cu ta inicio di e nivel 2 di normalisacion pa cu COVID-19.. Asina prome minister Evelyn Wever a bisa diaranson anochi durante e briefing riba crisis di coronavirus. Scolnan cu ta cla pa habri, por haci esaki. Esnan cu no ta cla, ta cuminsa prepara y ta habri dia 25 di mei proximo. E motibo duna ta cu gobierno no por sigui hustifica cu un grupo grandi di alumno ta saliendo perhudica cu e ciere di scol, siendo cu e crisis ta bon bou di control. A mustra cu 60% di alumno a keda perhudica, y ta primordialmente pa e grupo aki a tuma e decision aki. E bon noticia ta cu tin un grupo si di 40% cu ta ok, y mayoria di nan ta scolnan priva y otronan cu si a haya e ayudo necesario. 

CAMBIO SI

E mandatario a sigura cu ta haciendo tur cos pa sigura cu ora cu scol habri, cos bay bon. Reglanan nobo lo conta, manera con ta maneha e scolnan ora cu nan habri. Entre otro e interaccion entre docente y alumno, e forma di limpiesa, etc. Tambe pa esnan cu ta buscando y hibando nan yiunan lo ta diferente den e ‘normal nobo’. Lo tin regla nobo con pa atende cu e parti aki, esta cu p.e. no por hiba yiunan te bek den klas. Tambe si e mucha antes tabatin un poco griep, ta hibe scol toch. Awor esey no ta posibel mas. Si e mucha ta un poco malo, e tin cu keda cas. Esey ta conta pa maestronan tambe. 

MIEDO

E mandatario a confirma cu tin miedo den comunidad pa cu e reapertura di scol. Pero tin cu informa nos mes riba e situacion actual. E virus aki no ta bay pa awor, y tin cu bay siña biba cu ne. Y lo haci tur cos con pa siña biba cu esaki. WHO a anuncia diaranson cu por lo pronto e virus aki lo no bay y lo tin cu siña biba cu esaki. Y nos tin cu haci mescos pa siña biba cu esaki.