De Veer: Contento cu por re-inaugura Drive Inn bek

ORANJESTAD – Drive Inn Theatre manera cu nos a conoce antes ta bin bek. Tanto minister di infrastructura Marisol Lopez Tromp como CEO di MetaCorp Eddie de Veer a confirma diaranson mainta cu e proyecto ta bek. Durante su paseo na varios proyecto cu a cuminsa, minister Lopez a confirma cu e proyecto di Drive Inn ta un di esnan cu ta aproba y cu a cuminsa preparacion pa su ‘reconstruccion’. Esaki ta parti di e idea di gobierno pa ‘fast track’ e trabounan burocratico, cu ta nifica cu e proceso lo cana mas liher pa loke ta necesario pa construccion por tuma lugar. 

TRABOU NECESARIO

De Veer a splica cu trabounan di limpiesa di e area a cuminsa pa asina prepara pa haci e trabou necesario pa reinaugura e Drive Inn. “Nos ta hopi contento cu e movecionan a cuminsa bek” el a sigui bisa. Ta usando trahadonan cu ta na cas aworaki, y tur e tempo aki no a traha aunke a wordo paga. Nos tin nan ta haci limpiesa general”, de Veer a sigui bisa. No ta conoci cuanto tempo lo tuma pa keda cla cu e proyecto. 

LOPEZ

E intencion segun Lopez, ta pa e proyecto aki bira un alternativa pa esnan cu kier bay wak cine, y ainda cumpli cu e reglanan nobo di distancia social manera cu ta rekeri segun e crisis di COVID-19.