DIMP: Ta procesando e plachinan di number den tres fase

ORANJESTAD – For di algun tempo caba, por a mira varios auto ta coriendo caba cu nan plachi di number nobo (2020), pero e entrega y proceso aki a bay sin mucho atencion. Esaki ta pasobra ta resulta cu e departamento di impuesto (DIMP) ta hacienda esaki den un forma diferente, y a haci esaki e biaha aki den tres fase. Tur esaki relaciona cu e.o. e reto di covid 19 y e tardansa pa a ricibi e plachinan e aña aki. Pero tur cos ta canando bon si. Pa loke ta e distribucion di plachi di number 2020 DIMP ta anuncia lo siguiente:

Prome fase 

Den e promer fase nan a otorga e plachinan na e companianan priva, departamentonan di gobierno, fundacionnan y otro instancianan. Dia 28 di april ultimo nan a anuncia cu e ultimo dia pa entrega e listanan necesario tabata 8 di mei ultimo. Nan ta gradici tur instancia cu a haci bon uzo di e oportunidad pa manda nan lista. Tawata un placer pa sirbi boso na un manera diferente. Na e momentonan aki nan ta finalisando e ultimo trabaonan pa cu e listanan menciona. Na e instancianan cu a manda nan lista despues di dia 8 di mei, nan ta participa cu lamentablemente e peticionnan aki lo no por wordo honra debi na e comienso di e siguiente fase.

Di dos fase

Nan ta preparando pa start cu e segundo fase e siman aki, den cual nan ta duna oportunidad na algun empresa local pa ofrece nan servicio di entrega plach’i number na e contribuyentenan. Nan ta anuncia enfaticamente cu e servicio di compania di ‘delivery services’ NO ta obligatorio. Ta keda na un contribuyente si e ta scoge e opcion di laga un compania di delivery busca y entreg’e su plachinan di number.

Nan lo bay traha cu algun compania local cu lo bay funciona di acuerdo cu nos regla- y proceduranan pa asina por garantisa cu e otorgamento di plachi por sosode na un manera structura y sigur.

Di tres fase

Den di tres fase nan lo bay entrega e plachinan di number di e personanan individual cu no a ricibi nan plachi ainda. Esaki lo tuma lugar despues cu elimina e medidanan di Shelter in Place. E fecha exacto lo wordo anuncia asina cu nan tin permiso di autoridadnan concerni.

Di e forma aki nan ta purba di brinda Bo servicio na un manera diferente pero sigur.