Pauw ta confronta Knops den programa riba nos relacion cu Hulanda

HILVERSUM – Durante e programa ‘Samen Een Koninkrijk’ na television Hulandes diasabra pa colecta fondo pa islanan Aruba, Corsou y St Maarten relaciona cu e efecto di crisis di COVID-19, a surgi un combersacion interesante entre secretario di estado Raymond Knops, periodista hulandes Jeroen Pauw y e moderador y organizador di e programa, Jandino Asporaat: ‘E realidad di e relacion entre e islanan di Caribe Hulandes y Hulanda’. Knops entre otro a sigura tur hende cu Hulanda ta para banda di esnan cu ta desampara awor riba e islanan di Caribe Hulandes pa motibo di e crisis, pero cu si gobierno di e respectivo islanan a tuma decisionan diferente durante añanan, cos lo tabata diferente awe. E programa special a recauda 1 miyon euro na final, cu lo wordo reparti entre e islanan. 

E SITUACION

E tema di relacion entre Hulanda y e islanan rapidamente a bin na ordo, ora cu a cuminsa splica e situacion social riba e islanan. Knops a repasa e ayudo cu Hulanda a duna recientemente, tanto na material y placa. A elogia e forma con e islanan a traha pa por contene e virus lihe, cu e situacion ta basta bon contene. Ta conoci cu si tin un brote grandi, rapidamente e capacidad di e islanan ta pega. Y como tal a manda ayudo mesora pa percura pa e parti medico ta mehora. Pa awor, esaki ta mustra di ta ok. Aki ta unda cu e periodista Pauw a cay aden, pa mustra cu loke ta wordo haci, por ta bon, pero no suficiente. Y el a usa su experiencia propio di e islanan, pa fortifica su punto di bista. Y aki e asunto a bira mas interesante. 

IGUALDAD FORMAL VS IGUALDAD REAL

E periodista conoci Jeroen Pauw a confronta Knops cu un situacion cu e mes conoce bon di e islanan. E mes gusta un di e islanan hopi (Corsou). Y manera cu Jandino mes a conta, Pauw tin un cas eynan y ta bishita e isla 4 luna pa aña. Basa riba su conocemento, Pauw a purba mustra Knops cu mientras cu tin un igualdad ‘formal’ entre e islanan y Hulanda, no tin un igualdad real. Aki Knops ta purba corigi’e, bisando cu nan ta enberdad igual na otro. “Si, pero mira Corsou”, Pauw ta interumpi e mandatario. “Tin ni 170 mil habitante, lagando ilegalnan afo” Pauw ta cuminsa bisa. E ta haci mencion di algun di e cosnan cu e isla tin, y ta bisa cu e isla tin mucho cos pa atende y su so pa 170 mil hende e no ta logra atende cu e crisis aki. Segun Pauw, Corsou por a usa e fondonan recauda prome cu COVID-19 caba, pa e necesidad cu e mester. E no tabatin mester di un crisis asina pa haci un programa asina. “Pasobra prome caba, tabatin hopi pobresa” Pauw a continua bisando. “Tin hopi pobresa, tin hopi desigualdad. Esey ta asina, pasobra tin algo cu no ta corecto den e acuerdo cu lo wordo celebra na October (e tabata referi posiblemente na e status ‘nobo’ di e isla:red )” Pauw ta bisa. Segun e periodista, bo no por spera di un isla asina chikito, pa nan mes regla nan asuntonan, keto bay refiriendo na Corsou. 

KNOPS TA REACCIONA

Knops a reacciona riba esey cu e ta di acuerdo di e desbalanse cu tin den e islanan pa loke ta clase. Tin hendenan hopi rico y tin hende hopi pober. Pero mesora Knops ta referi tambe na e hecho cu no semper (e gobiernonan) a tuma bon decision ultimo aña pa loke ta nan maneho, mientras cu tin hopi potencial unda cu e isla por regla un cantidad di cos tremendamente bon manera enseñansa, salud, asuntonan social. “Pero tin hopi hende cu no ta paga impuesto, of tin hende cu salario halto. Y esey no por ora cu bo organiza un pais. E ora bo mester tene cuenta cu bo finanzas publico y tene nan na ordo”. A referi na imagen di hendenan pober den necesidad. “Esey ta e hendenan pa cual nos ta yuda cu tin aworaki. Mi ta haya e accion aki fantastico, pesey mi tey. Pero mester sosode hopi mas. No ta suficiente pa resolve e problema real (cu ta problema di finanzas di e islanan)” Knops a bisa. Na final na nomber di gobierno Hulandes, a haci un donacion di 100 mil euro. Potret cortesia Caribisch Netwerk.