Van Trigt: Habri scol bek no ta trece riesgo hopi grandi

ORANJESTAD – Tur cos ta mustra cu gobierno ta preparando pa reapertura di scolnan na Aruba. Y for di e presentacion cu e docter di cas dr Joaquin van Trigt a duna dialuna anochi, esaki lo por ta pronto. E presentacion di van Trigt ta resumi cu e situacion ta mustra di ta basta safe ora cu ta trata mucha relaciona cu e peliger di COVID-19. Y for di tur informacion acumula, e peliger pa mucha ta minimal. Y cu si uza e protocolnan disponibel manera cu Hulanda a uza, no mester tin problema pa muchanan bay scol bek pronto. Pues por deduci cu ta ok pa scol habri atrobe.

DETAYES

Segun van Trigt, e pensamento ta cu ya cu a cuminsa flexibilisa e medidanan, ta mas cu logico cu dado momento mester cuminsa pensa pa habri scolnan tambe. Durante un reunion cu varios protagonista riba e tereno relevante dialuna manera organisacionan di varios scol, seguridad di mucha, departamento di salud y mas, a yega na un liña di opinion cu tur ta di acuerdo pa habri scol bek. 

CIFRA MEDICO

Pa por a duna un miho bista, van Trigt a duna un presentacion chikito cu cifra y grafico, pa tur hende haya un bista kico e impacto di COVID-19 ta riba un mucha. A compara e situacion di Hulanda y Aruba, y a mira cu p.e. na Aruba di e 101 casonan positivo, no tin ningun mucha na Aruba cu ta den edad di 0 pa 4 aña cu a keda contagia, mientras cu Hulanda tin algun. Tin 2 mucha entre edad di 5 y 9 aña y 4 den edad di 10 pa 14 aña. Ademas ningun di e muchanan contagia na Aruba a keda hospitalisa. E chens di complicacion cerca muchanan pa COVID-19 no ta hopi grandi, y muchanan no ta wordo pega hopi liher cu COVID-19. A splica tambe cu tur e casonan di muchanan contagia na Aruba, a bin for di un adulto cu tabatin e virus. Pues no ta cu mucha a pega otro mucha. E chens cu mucha ta pega otro of pega adulta ta mustra minimo. “Esey ta importante ora cu bo ta pensa pa bay habri scol, ki e riesgo ta pa Aruba” van Trigt a bisa. Y mayoria di e casonan no ta asimptomatico. E muchanan ta haya e simptomanan hopi leve. 

MIEDODen comunidad, pa falta di informacion, tin hopi miedo ainda segun van Trigt. Y pesey a duna tur e informacion pa suavisa y elimina e miedo ey. A splica cu ora tuma un decision pa relaha e medidanan, mester tuma decision tambe pa habri scol. Habrimento di scol tin un riesgo hopi mas chikito, compara cu e riesgo pa flexibilisa medida regular. Tin basta siman cu e cantidad di caso positivo pa COVID-19 na Aruba ta stabil, esta cu esaki no a aumenta, y frontera ta cera, pues ta mustra cu nos no tin mas caso. “Pesey nos ta kere tambe cu e habrimento di scol no ta un riesgo hopi grandi cu ta trece cu ne”  van Trigt a sigui bisa. E protocolnan di Hulanda ta hopi estricto y nos por mantene nos mes na esaki y por traha nos mesun protocol, teniendo cuenta cu e condicionan di gruponan di riesgo. A delibera cu tur experto pa bin cu e protocol cu ta mas sigur pa tur hende por sinti su mes sigur sin cu nan ta core riesgo ora cu maestronan bay scol. Claro cu ta keda enforsa distancia social, tambe na scol unda cu tin suficiente distancia entre muchanan y entre mucha y e docente.