Lampe: Ley ta obliga gobierno duna de Schakel subsidio

ORANJESTAD – Segun minister di enseñansa Rudy Lampe, e no tabatin otro alternativa pa cumpli cu peticion di De Schakel pa dune subsidio. “Ley ta obliga nos, si bo ta cumpli cu tur e rekisitonan di ley di enseñansa, un minister no por nenga tal peticion” Lampe a sigura su seguidornan riba su pagina Facebook dialuna. Segun Lampe,  gobierno (lesa:minister Rudy Lampe) ‘mester a honra nan peticion cu nan ta bay bira un scol subsidia cu fondonan publico, maneha pa e stichting Educacion Combina”. Asina e ta reacciona riba e noticia cu e.o. Noticiacla.com a publica riba e hecho cu Stichting Onderwijs Combia ta tuma Colegio Arubano San Nicolas (CSN) over y introduci esaki na 2020. 

POSITIEF RAPPORT DI HULANDA 

Cu esaki, ta inicia un etapa nobo pa scol De Schakel, cu ta resulta di ta e unico scol na Aruba cu tin un positief rapport di inspectie di Hulanda, banda di inspectie di Aruba. E exito como modelo educativo ta cla y awor e mandatario ta sigura cu e kier trece ‘the best’ pa e muchanan di San Nicolas. 

CONSEHO DI DIRECTIE ONDERWIJS

Ta Directie Onderwijs ta esun cu foi (april) 2019 a conseha gobierno di Aruba (lesa: minister di enseñansa Rudy Lampe) pa scol secundario cuminsa cu enseñansa bilingual   (ingles y hulandes) . Asina e ta reacciona riba e noticia cu e.o. Noticiacla.com a publica riba e hecho cu Stichting Onderwijs Combia ta tuma Colegio Arubano San Nicolas (CSN) over y introduci esaki na 2020. Ademas e mandatario ta sigura cu trahadonan na CSN no mester tin miedo pa e.o. nan futuro na e scol. 

PAKICO DE SCHAKEL

Segun Lampe, De Schakel ta e unico scol na Aruba cu tin e experiencia pa ofrece enseñansa secundario bilingual. Ademas examen di nivel di Cambridge, ta wordo haci eynan tambe. “Y pesey expertonan cu a traha riba e documento, a recomenda pa nos cuminsa e trayecto pa Colegio San Nicolas por bira e buddy di e scol de Schakel” Lampe a sigui bisa. 

CSN TA KEDA SCOL PUBLICO

E mandatario ademas a sigura den su declaracion cu contrario na supuesto informacion incorecto,cu CSN lo keda un scol publico, y cu e schoolgeld tambe lo keda mescos (y no aumenta manera lo a wordo bisa efyo). “E personal di Colegio San Nicolas, ta bay keda personal di gobierno. Ta bay keda riba payroll di gobierno”. Segun Lampe, e unico cambio cu ta bay tini, ta cu na augustus lo bay bin un management team interino pa duracion di un aña. E management team aki tin e tarea di prepara e scol pa otro aña De Schakel tuma e mando over. E rector actual ta baha cu pensioen y e dos con rectornan lo retira tambe conforme nan contracto. 

PAKICO BILINGUAL

E hecho cu a scohe pa San Nicolas haya e scol aki bilingual ta pasobra e ciudad unda cu ingles ta e idioma pa mayoria di e muchanan. Ademas ingles ta e idioma universal. Pa loke ta e muchanan menciona, Lampe ta haya cu ‘ta mas cu logico cu bo ta scohe pa un enseñansa bilingue na San Nicolas. Tambe a toca e parti di resultadonan inferior cu tabatin ultimo añanan pa loke ta rendimento, Lampe ta kere cu awor na Aruba nos no por ta satisfecho. A referi na promedionan internacional, y compara cu Aruba, nos ta keda ‘abou’. NOTA: Potret ta un screen shot di e comentario di minister Lampe di su pagina di Facebook. 

PREFERA FACEBOOK

Lamentablemente e mandatario a opta pa no duna reaccion na e portal aki, y a opta enbez pa usa su pagina di Facebook pa haci esaki segun un video graba. Esaki ta pone cu no por a haci e mandatario pregunta riba e tema. Ora cu e portal aki a acerca e mandatario pa comentario riba e tema aki y otronan, el a nenga y a referi e portal pa tuma contacto cu director di directie onderwijs.