No tin fecha pa grupo di venezolano pega na Aruba bolbe nan pais

ORANJESTAD – Tin un grupo di 200 venezolano pega na Aruba, sin fecha pa bolbe nan pais. Un parti di e grupo aki, ta venezolanonan cu a keda pega ora cu gobierno di Aruba a impone e lockdown na maart, siendo cu nan fecha di biaha tabata despues. Tin un grupo cu a drenta Aruba legalmente pero no a bandona nos isla ora cu nan mester a haci esaki, y a bira ‘ilegal’. Tin un grupo tambe cu tabata deteni na KIA y cu a recobra nan libertad y mester keda deporta, y tin un grupo di venezolano cu for di comienso a drenta nos isla di forma ilegal. For di Consulado di Venezuela, Noticiacla.com a wordo bisa cu e grupo aki enberdad no por a bolbe Venezuela, no pasobra nan ta prohibi, sino no ta cla pa ricibi nan ainda pa cual no a duna autorisacion pa nan biaha. E peticion mientrastanto di esnan cu mester bay, ta den evaluacion di e comision presidencial y den referencia na esnan cu tin prioridad. Asina gobierno di Aruba a establece e situacion debi cu ta trata di buelonan comercial y no humanitario.   

PROCESANDO MAS GRUPO

E consulado a sigui bisa e portal aki cu fuera di e grupo pega na Aruba, tin mas grupo di venezolano otro caminda cu tambe  kier a bolbe. De hecho ta procesando un grupo di riba 29 mil persona cu a drenta e ultimo simanan, y ta den proceso pa keda cla pa nan por bay nan cas, segun protocol pa COVID. Esaki ta encera e.o. control medico, y cumplimento cu cuarentena obligatorio di 14 dia ora cu nan yega Venezuela. Ademas, contrario na loke un grupo di venezolano ta bisa, esta di cu nan tabatin pasashi pa p.e. Punto Fijo of otro destinacion pero no ta wordo permiti pa bay eynan awor, consulado a splica tambe cu e unico aeropuerto cu nan por yega awor, ta esun di Maiquetia. Simplemente pasobra esey ta e unico aeropuerto cu tin e facilidad cu por atende cu tipo di situacion manera di COVID 19, manera procesa nan den un facilidad pa cuarentena pa 14 dia. Den un situacion normal, lo no tabata problema pa e pasaheronan biaha pa nan destinacion ‘regular’ mesora for di Aruba. Pero, awor e situacion, no ta uno normal. Esey ta haci cu no por laga hende biaha pa otro ciudad y/of aeropuerto, manera cu un par di venezolano pega na Aruba ta bisando. Segun consulado, asina cu nan ta asina leu, lo por saca e grupo aki for di Aruba y manda nan bek pa Venezuela. E grupo cu tin prioridad, ta esnan cu ta ilegal, y cu mester keda deporta.