Anthony: Debi na nan network capable, Cruza Cora lo maneha ayudo humanitario

ORANJESTAD - Ta importante pa usa un network capabel y liher. Esaki ta pakiko Cruz Cora lo bai tuma e coordinacion y duna asistencia hunto cu e otro organizacionan di ayudo riba e islanan pa loke ta e suma di 16.5 miyon euro recien ofreci door di Hulanda. Asina hefe di mercadeo di Cruz Cora na Aruba Indra Anthony a bisa dialuna. Manera noticiacla.com a raporta caba, Gobierno di Hulanda a pidi Cruz Cora pa coordina ayudo humanitario pa Korsou, Aruba y St. Maarten.

CONSECUENCIA

E consecuencianan di e pandemia Corona por wordo sinti tur caminda. E impacto den e parti Caribe di Reino ta significante. E islanan ta depende grandemente di turismo, cu a bin para completamente keto. Desempleo riba e islanan ta aumentanto liher, y casnan ta cay bou nivel di pobreza. Tin un necesidad urgente pa asistencia di emergencia. 

SUMA

Ministerio di Asuntonan di Interior y Relacionan di Reino (BZK) a pone 16 miyon Euro disponibel. E fondo aki ta wordo usa pa provee casnan den situacion mas vulnerabel cu cuminda pa asina e necesidad basico wordo cubri. E necesidad ta halto y inmediato.  

EXPERIENCIA

Cruz Cora tin departamentonan riba cada isla y cu hopi aña di experencia den ayudo local. E organizacion di disaster aki tin contacto di serca cu otro organizacionan cu ta duna ayudo riba e islanan. Hunto nan lo yuda esunan mas hopi afecta pa e Coronavirus. 

AYUDO LO CUMINSA MESORA

Discusionan ta wordo teni actualmente  cu varios organizacion di ayudo pa por cumpli cu e condicionan preliminar mas pronto cu ta posibel. Asistencia lo wordo duna den forma di pakete di cuminda, y distribucion di cuminda cayente pa esnan sin cas y cu no por cushina mas of haci compras nan mas.  Tambe un voucher di compras lo ta disponibel pa haci compras di supermercado. E ayudo aki lo cuminsa mesora y lo sigui te fin di Augustus.