Cruz Cora encarga cu e ayudo humanitario di 16 miyon euro

DEN HAAG/ ORANJESTAD  - Hulanda (Gobierno di Reino) a pidi Cruz Cora pa coordina ayudo humanitario di 16 miyon euro cu a keda anuncia reciente pa e islanan Aruba, Corsou y St Maarten. E suma ta disponibel mesora y ta dura te fin di augustus 2020. Asina e oficina di representacion di gobierno Hulandes (VNO) a informa dialuna mainta. Ora cu secretario di estado Hulandes Raymond Knops dia 24 di april ultimo a anuncia e decision di conseho di minister di Reino, no tabata conoci ainda ken y cua instancia(nan) lo keda encarga cu e trabou aki. Awor a bira conoci cu ta Cruz Cora lo maneha esaki. 

Tur parti ta sinti e consecuencianan di e pandemia di corona. Den e parti Caribense di Reino tambe e impacto ta grandi. E islanan ta depende pa gran parti di turismo cu a para casi por completo. Desempleo riba e islanan ta crece den tempo rapido loke tin como consecuensia cu mas y mas cas di famia ta baha bau di e liña di pobresa. Tin mester di ayudo di emergencia urgente.

Ministerio di Asuntunan Interno y Relacion di Reino a pone € 16.000.000 disponibel. Ta uza e placa pa inmediatamente suministra ayudo di cuminda, di manera cu por satisface e necesidatnan basico. Tin mester di ayudo urgente y inmediato. Pa e motibo ei mester haci uzo rápido di un ret adecua. P’esei Cruz Cora lo tuma e tarea di coordinacion y dunamento di ayudo hunto cu otro organisacionnan di ayudo riba e islanan.

Cruz Cora tin seccionnan riba e islanan y como tal tin hopi aña di experencia cu ayudo local. E organisacion di ayudo di emergencia tin contacto estrecho cu otro organisacionnan di ayudo riba e islanan. Hunto nan ta bai yuda esnan mas afecta den e tempo di crisis di corona aki.

Na e momento aki tin combersacionnan ta tumando luga cu diferente organisacion di ayudo di manera cu por duna contenido rapido na e condicionnan esencial. Ta ofrece e ayudo den forma di pakete di cuminda, distribucion di cumindanan ‘ready-to-eat’ pa personanan cu no tin cas y pa esnan cu no por cushina of hasi compra nan mes. Tambe ta pone un tarheta di pago disponibel cu cua por haci compra. E ayudo ta start inmediamente y lo dura te fin di augustus.