DOW: Control ta bay cuminsa riba Construccion y Mantencion

ORANJESTAD - Den cuadro di e Crisis di Covid 19 y e MR corespondiente di Gobierno di Aruba; promer fase di recuperacion di Aruba su economia a cuminsa y companianan di construccion y mantencion a cuminsa registra na DOW como parti di Fase 1. Hopi compania ya riba e promer dianan a registra y entrega nan documentonan digitalmente pa asina nan por haya permiso pa cuminsa.  E proceso di verificacion a tuma lugar y asina varios compania y individual a haya nan permiso necesario pa cuminsa traha. Ta importante si pa señala cu e companianan y individualnan mester atene nan mes na e reglanan di e “Normal Nobo” den mundo di Construccion y Mantencion, esey ta encera cu mester cumpli cu reglanan nobo pa combati Covid19 Corona virus na sitio di trabao. Esaki ta pa proteha e trahadornan mes, nan famia, coleganan y e comunidad di Aruba. Pesey mes tin un Taskforce cu a ser instala cual lo cuminsa haci nan trabao di control entrante dialuna awor. E control ta pa sigura cu e reglanan ta ser cumpli cu nan y e condicionnan cual a otorga e permiso tambe ta ser cumpli cu n’e. Si nota cu tin fayonan cu ta tumando lugar riba e puntonan menciona, e Taskforce tin e autoridad pa actua, duna boet y hasta para e trabaonan. Companianan cu no a registra pero cu si ta trahando tambe por haya multa y trabou por wordo para. Esnan cu no a registra ainda ta ser recomenda pa haci esaki mas pronto cu ta posibel na www.dow.awof yama telefoon 5284858 pa haci un cita. Si bo no a registra y haya permiso, bo no por ta trahando riba ningun projecto na e momentonan aki. DOW y Gobierno ta spera cu tur hende compronde e circumstancianan cu nos ta pasando aden y pa nan cumpli cu locual ta ser pidi di nan pa hunto nos restart Aruba su economia den forma ordena, legal y sigur pa un y tur.