Gobierno di Aruba evaluando pa habri frontera aki 6 siman

ORANJESTAD – Gobierno di Aruba ta evaluando pa habri frontera pa turismo entre 15 di juni y 1 di juli proximo, esta entre 6 pa 8 siman awor den forma di un ‘soft re-opening’. Asina minister di turismo Dangui Oduber a anuncia durante e briefing pa coronavirus diabierna anochi. Lo haci e reapertura di un forma responsabel cu tur instancia manera ATA, Salud Publico y aeropuerto cu ta preparando un protocol necesario. Mes momento CEO di ATA Ronella Tjin Asjoe a bisa si cu por spera na comienso apenas 10% di e cantidad di turismo cu lo por cuminsa bin Aruba. Pues no spera cu mesora cantidad di turista lo cuminsa yega nos isla. Ademas e CEO a mustra cu di esnan encuesta pa Merca, un total di 14% a informa cu asina cu kita e bareranan, lo cuminsa bishita Caribe (incluyendo Aruba) bek. Tene na cuenta cu ta apena 14% y cu lo tuma un poco mas tempo pa yega na e cantidad cu nos ta conoci.