Knops: Ayudo pa Caribe Hulandes pa coronavirus por yega 1 biyon euro

DEN HAAG – E sosten financiero pa e 6 islanan Aruba, Curaçao, Sint Maarten, Bonaire, Saba y Sint Eustatius a consecuencia di e coronavirus por yega 1 biyon euro. Asina secretario di estado Raymond Knops ta bisa e portal Hulandes NOS. Aruba so a pidu 1.3 biyon, di cual un parti mester tabata un ‘regalo’. Na tur, Hulanda a dun 150 miyon euro, pero esey por subi fuertemente e proximo tempo.”Ta hopi placa, sigur si dura mas largo”. 

Knops ta recorda cu e islanan ta financieramente dependiente di e industria di turismo y e pregunta ta ki tempo esaki ta cuminsa atrobe. “E economianan tabata debil caba. Y e debilidad ey a keda expone mas ainda door di e coronavirus. Tambe e hecho cu nan ta islanan chikito, ta haci nan mas vulnerable pa brotenan nobo. E limite djisaki ta wordo yega” Knops ta sigui bisa. 

CONDICION SERIO

Aruba, Curacao y St Maarten ta islanan autonomo dentro di Reino Hulandes y ta responsabel pa nan mesun maneho. Pero nan tur ta bati na porta di Hulanda awor. “Esey kier men cu nos ta bay duna sosten economico den forma di fiansa bou di condicion fuerte”. Un di nan ta cu e paisnan mester duna e ayudo si na doñonan di trabou y trahadonan pa tene e economia na bida. Hulanda lo pone exigencia tambe riba e finanzas publico. “E tres islanan prome cu e crisis ya caba no tabatin nan presupuesto na ordo” Knops a sigui bisa. Cu Hulanda ta duna asistencia Medico, ta sin mas. Fuente: NOS.