FTA y Hilton a sera acuerdo pa temporada di crisis

ORANJESTAD - Federacion di Trahadornan di Aruba den representacion di e empleadonan di Hilton Aruba Caribbean Resort & Casino a firma awe un protocol cu e empresa hotelero den cual ta garantisa na e empleadonan 80% di nan salario mientras cu e crisis ta perdura y e hotel ta ricibi subsidio di Gobierno. E orario di trabao tambe lo wordo limita na maximo 80% di e orario regular.

Manera ta conoci Gobierno di Aruba por medio di un fianza for di Hulanda ta ofreciendo empresanan cu mas ta wordo afecta door di e crisis un subsidio di 60% di e gastonan di salario bou condicion cu ta mantene trahadornan cu empleo y entrada. Pa locual ta e diferencia (40%) ta keda na cada dunador di trabao pa yega na un acuerdo cu su empleadonan o nan representante, con ta compensa esey.

Firmando e protocol antes menciona partidonan di forma mutuo a yega na un entendimento riba reduccion temporario di horario di trabao y mantencion di entrada. Di e forma ey cumpliendo cu tur legislacion laboral di nos isla.