OMT: No ta responsabel habri Caribe Hulandes pa turismo ainda

DEN HAAG – Segun un carta di e director di Rijks Instituut voor Volksgezondheid en Milieu (RIVM) Hulanda, por lo pronto no ta responsabel pa habri Cariba Hulandes pa turismo. Director di RIVM, esta Jaap van Dissel a manda e conseho den un carta pa ministernan di salud di  Aruba, Corsou, St Maarten y islanan BES 2 siman pasa (24 di april 2020). Segun e conseho3 (cu noticiacla.com tin den su poder) OMT Cariben ta nota cu mientras e islanan a tuma medidanan corecto pa bringa e brote di plama, toch e momento aki no tin suficiente medida adecuado pa admiti turismo riba e islanan, y mes momento preveni importacion di pashentnan nobo. “Si no tuma medida structural, ta existi e risico cu turistanan lo por forma un peso mucho grandi riba e capacidad limita di cuido” e rapport ta sigui bisa. “Tambe mirado e trayecto ‘largo’ di tratamento, ta keda insuficiente capacidad pa cuido medico local”.   

Segun e carta, den e proximo simanan hunto cu e islanan, lo mester traha un plan pa instala e capacidad di cuido (ICU, cuido agudo y cuido elective) di tal forma cu den caso di un necesidad mas grandi di cuido, por atende cu tanto e poblacion local como tambe e turistanan. “Ta solamente ora cu e por garantisa e cuido pa ambos grupo, e admision di turistanan ta bira realistico” segun e conclusion di e rapport extenso  di OMT Cariben. Mester tene na cuenta cu e carta aki ta traha, despues cu Aruba ( y e otro islanan den Caribe Hulandes) a ricibi e ayudo medico. No ta conoci si esey kier men cu e ayudo no ta suficiente. Mester bisa tambe cu den varios declaracion di gobierno di Aruba (lesa:Prome minister Evelyn Wever Croes), a sigura cu awor (cu ayudo ricibi di Hulanda), cu Aruba ta ok localmente pa atende cu e crisis, pero no si esaki expande pa e.o. turistanan y otro bishitantenan di exterior, ora cu habri frontera den futuro ‘cercano’.   

Manera por corda, comienso di luna pasa, Aruba ( y e otro islanan di Caribe Hulandes ) a ricibi ayudo cu Hulanda a manda recientemente (e camanan extra di ICU, personal medico y medicamento). Ta trata pa Aruba y Corsou 12 cama ICU y pa Bonaire 6 cama y medicamento for di Hulanda, hunto cu personal cu a yega despues di Merca.