Mientras aeroliñanan si ta exigi esaki, Aruba no ta rekeri mondkapjes obligatorio

ORANJESTAD – Mientras cu varios aeroliña internacional cu ta frecuenta Aruba, y negoshinan cu a habri e siman aki ta obliga clientenan usa mondkapjes, e crisis team di COVID 19 no ta haye obligatorio pa usa nan. Asina miembro di e team Sharline Koolman a contesta noticiacla.com diaranson anochi. “Te aworaki nan, e maneho local, no a bay over na uso di mondkapjes algemeen” Koolman a cuminsa na contesta. “Na e momento cu e profesionalnan yega na e afspraak cu Volksgezondheid hunto, cu na e momento aki mester cambia esey, nos lo anuncia esey” Koolman a sigui bisa. Cu esaki e ta mustra cu ainda esaki no ta necesario. “Pero na e momentonan aki esey no ta valido”. Companianan (manera aeroliñanan ) cu ta exigi di nan pasaheronan pa usa esaki, esey ta un palabracion cu e pasahero ta haci unabez cu e cumpra un pasashi cu e respectivo aeroliña. 

AEROLIÑANAN

Manera cu e portal aki a raporta caba, e aeroliña JetBlue (cu ta biaha pa Aruba) a bira e prome aeroliña Mericano cu ta anuncia cu tur pasahero mester bisti mondkapje durante buelo. Entrante 4 di mei, tur pasahero ta rekeri pa bisti e mondkapje cu ta cubri nan boca y nanishi durante cada buelo, tambe durante checking, ora di aborda y baha di avion segun un declaracion di JetBlue. “Nos ta pidiendo nos clientenan pa sigui e guia di CDC (Centro pa Control di Malesa contagioso)” E presidente di e aeroliña Joanna Geraghty a bisa.  E masker no ta pa proteha bo mes, sino pa proteha esnan rond di bo, segun e aeroliña. Lo manda un mail pa tur cliente (pasahero) y lo pone na tur aeropuerto. Ya caba ta exigi esaki di e tripulantenan.

OTRO AEROLIÑANAN  

Mientrastanto e aeroliña mas grandi di Merca American Airlines ta exigi di tur su tripulantenan pa entrante 1 di mei, nan cuminsa bisti mondkapjes. Pa loke ta pasaheronan, nan lo wordo ofreci ekipo di proteccion. United Airlines a obliga su personal di cabina pa bisti e mondkapjes for di diabierna ultimo.

NEGOSHI NA ARUBATin varios negoshi cu a habri bek e siman aki, cu ta exigi di nan clientenan pa bisti mondkapjes, si nan kier drenta e lugar pa haci compra. No ta conoci si e cliente ta ricibi e mondkapjes gratiutamente, of si nan tin cu cumpre prome cu nan drenta.