Minister cu intencion di prohibi ATV/UTV di core riba caminda grandi

ORANJESTAD – Dentro di poco, lo no permiti e vehiculonan special conoci como All Terrain Vehicles (ATV), y UTVs, pa subi caminda publico. Asina por a compronde di minister di infrastructura Marisol Lopez Tromp. Ademas, lo restringui e areanan unda cu si e vehiculonan aki por trafica, pa asina no sigui daña medio ambiente. Tur esaki di acuerdo cu e maneho di   ROP/ROPV. 

DAÑO CAUSA

E mandatario ta acepta cu ta un realidad cu diferente areanan natural/ proteha, den transcurso di añanan a sufri hopi door di daño cu a wordo cometi. Entre otro, por referi na e discusionnan continuo riba ATV/UTV. Minister Lopez - Tromp den e rueda di prensa di diaranson a splica di e hecho cu banda di e aspecto di naturalesa tambe tin e parti di seguridad den trafico. Aruba ta entre e poco paisnan cu ta permiti pa core UTV/ATV riba camindanan grandi/ publico. E vehiculonan no ta ‘safe’ pa e manehadornan y tampoco pa e seguridad en general di trafico. 

AREA PROTEHI

Den cuadro di esaki e proteccion y cuido di naturalesa y medio ambiente ta importante. Y considerando e diferente areanan proteha rond Aruba, e no ta e intencion pa e tipo di actividadnan aki continua den e areanan ey, esaki ta regla den e ROP/ROPV, Minister Lopez - Tromp a accentua.

POCO TA KEUR

Loke tambe e mandatario a admiti awe ta cu ta un grupo relativamente chikito di ATV/UTV ta acudi y cumpli cu e keuring. E proceso di DTI pa ATV/UTV ta encera entre otro: control pa seguro valido, plachi di number mester ta paga y e diferente rekisitonan di e estado di e vehiculo. Esakinan lo determina si ta pasa e keuring of no. Tur e aspectonan aki ta sumamente importante pa percura pa mas seguridad di e manehadornan cu hopi biaha ta turista pero sigur nos localnan tambe. 

MAS INFORMACION

Pa conclui, Minister Lopez - Tromp a indica cu pronto comunidad lo bay mira mas informacion di su ministerio cu lo enfoca riba proteccion di e areanan destina pa naturalesa, for di daño di e vehiculonan aki den futuro. Ademas, percura pa di un forma of otro logra cu e cantidad di e tipo di vehiculonan aki cu ta presenta na DTI pa keur ta aumenta. Pues un maneho cu enfoke specifico riba e aspecto di cuido di naturalesa y medio ambiente y seguridad a traves di e proceso di keuring.