Baly: Aruba no ta cla pa e ‘normalidad nobo’ manera minister kier

ORANJESTAD –  Aruba no ta cla pa e normalidad nobo manera cu minister Rudy Lampe kier, esta e asina yama  ‘distance learning’, osea siñamento of scol riba distancia. Esey ta e pensamento di e director di Stichting Katholiek Onderwijs Aruba (SKOA) Anuesca Baly na noticiacla.com. Baly ta compronde e mandatario (Lampe) y ta respet’e, pero esaki ainda no ta posibel. “Distance learning ta bira new normal ora cu tur hende, tur mucha tin e mesun oportunidad. Esey kier men device, internet, tur mucha, docente, tur hende”, e director ta sigui splica. 

CAMBIO DRASTICO DEN ENSEÑANSA

E mandatario di enseñansa e siman aki a ‘los’ algun deseo di cu a pone hopi hende (tanto mayor como docente) pensa seriamente riba dje. Y no necesariamente den un forma positivo. E mandatario a sugeri entre otro cu por tin menos dia di les, cu e hogar ta bira e lokaal nobo di enseñansa, cu e mayornan ta bira e docentenan di nan yiunan y mas dje ideanan aki. E aspectonan aki a crea preocupacion cerca hopi mayor y docente, y cada uno cu nan motibo. Aki tambe Baly ta mustra cu esaki no por bira un realidad sin mas. Un di e ehempelnan mas simple ta e idioma, segun Baly. E ta referi na e hecho cu Aruba ta un pais multilingual unda cu tin mayornan cu ta papia spaño, ingles, chines y mas. “Con nos ta bay verwacht cu e mayornan ta bay yuda e alumno (nan yiu-nan), (refiriendo na scol basico den e caso aki), si e no ta domina e idioma di instruccion of e idioma di e bukinan? Con?” Baly ta puntra. Con un mayor por reemplasa un maestro cu a studia e profecion y tin dominio didactico di e materia y awor un mayor lo tin cu tuma e tarea aki over. E ponencia aki ta manera un desprecio pa un vocacion tan importante.  Como tal e ideanan cu e mandatario a presenta, no ta ‘ehecutabel’. Pa tur e ideanan di e mandatario bira realidad, ta hopi cos tin cu ser cambia y /of tuma lugar prome, segun e director a sigui bisa.

BEVOEGD GEZAG

Acerca ta bin e hecho cu mientras cu minister Lampe kier introduci yen di cambio, esaki no por sosode sin mas. E minister por dicidi solamente pa e scolnan cu ta cay bou di su maneho, esta e scolnan publico (DPS). Pero e no por dicidi pa un fundacion di scol of directiva di scol cu tin nan autoridad competente (bevoegd gezag). “Minister no ta bevoegd gezag pa stichtingnan” Baly a sigui splica. Esaki ta conta pa mayoria di asunto cu e mandatario lo kier introduci. Den e caso di SKOA, e fundacion aki tin su regla y ley ta determina kico tur por y kico no. Por ehempel, si kier trece cambio den cierto orario di les, of tipo di les, esaki ta stipula segun ley y no por yega cambi’e sin mas. Y esaki ta bay tambe pa e contenido di e lesnan cu ta wordo duna na e respectivo scol. Ta continua..