Aumento di cuarentena ta grupo di ICU cu a yega di Merca ayera

ORANJESTAD – E grupo nobo di personal pa ICU (Intensive Care Unit) a yega Aruba ayera, y mesora nan a bay den cuarentena segun palabracion. E cuarentena ta dura 14 dia y despues cu nan sali, por cuminsa haci nan trabounan pa cual nan a bin Aruba. Esaki ta e ‘discrepancia’ cu tabatin cu e cifra di e aumento di cuarentena entre ayera y awe cu 29 persona. E grupo di ICU ta bin asisti Aruba pa un periodo di por lo menos 3 luna, manera cu tabata e intencion di e prome grupo, cu mientrastanto a bolbe Merca bek despues cu un di e personanan (na Corsou) a resulta di tin e virus. 

E GRUPO ANTERIOR

E grupo anterior di 21 enfermero Mericano cu a yega Aruba diahuebs 23 di april ultimo, tambe forma parti di e compania AMI Expeditionary Healthcare, miho conoci como Aspen Medical International AMI. Nan ta prove servicio medico na instancia internacional. Y e grupo aki a keda contrata pa Hulanda pa haci esaki pa Aruba. Nan ta consisti di medico y enfermeronan registra y specialisa den cuido intensivo y calamidad a yega for di Merca pa sostene y reinforsa Hospital pa amplia e capacidad di cuido pa asina hospital por normalisa su cuido regular bek. E asistencia di e profesionalnan aki for di Merca tur ta forma parti di e pakete total di ayudo cu a wordo manda via hulanda pa Aruba y e otro islanan. NOTA: E potret ta di archivo di noticiacla di e avion cu a busca e prome grupo di AMI cu a bolbe Miami dia 25 di april ultimo.