IATA: Distanciamento social riba buelo no tin sentido

GINEBRA – E asosacion internacional di transporte (IATA) no ta pro pa tene asientonan liber den avion pa bringa plamamento di e coronavirus. Traduci, e no ta kere den distanciamente social riba avion manera cu kier sugeri y ta mustra cu esey no tin sentido. Si ta ta sostene e idea pa laga pasaheronan bisti mondkapjes. “E practica ta bisa cu e risico pa brote abordo di un avion ta hopi abou”, e hefe Alexandre de Juniac a bisa. 

OBLIGACION

Un cantidad creciente di aeroliña, entre nan, KLM, ta obliga tanto personal como pasaheronan pa tapa nan boca y nanishi cu mondkapjes. Tambe algun ta pidi pa tene e stulnan mey mey di e rei bashi, pa crea mas espacio entre pasaheronan.  IATA no ta kere den esey. Segun e asosacion, un cabina di avion no ta un bon ambiente pa un virus plama. De hecho, segun e presidente, pasaheronan no tin hopi contacto ‘cara a cara’ cu otro y e aire abordo ta wordo refresca hopi lihe y ta tuma medida ora cu ta haci e aparatonan extra limpi pa seguridad. “Nos tin cu percura pa un solucion duradero cu ta garantisa salud di e pasahero y  tripulante, y cu mes momento ta mantene e negoshi di aviacion pagabel. Uno no por sin e otro” de Juniac a sigui bisa.

STUL LIBER

Ora cu laga e stulnan mei mei liber permanentemente, e ta forza aeroliñanan pa bula cu avionan cu por wordo yena maximo pa dos tercera parti. Esey ta nifica cu e buelonan no ta bira rendable, a lo menos cu subi e prijs di pasashi. Pero esey ta nifica cu biahamento lo bira mas caro ainda cu na su turno, ta nifica cu lo bende menos pasashi. Y finalmente, door di esaki, toch ainda e aeroliñanan por haya nan mes den problema financiero.