• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Baly: SKOA ta wardando plan di gobierno pa reapertura di scol

ORANJESTAD – Mientras cu nan si a traha nan protocol interno, Stichting Katholiek Onderwijs Aruba (SKOA) no a ricibi ningun protocol di parti di gobierno (lesa: minister Rudy Lampe y e crisis team di COVID 19), con y kico mester haci ora cu scolnan habri bek, dia nan habri bek. Manera ta conoci, pa di 4 biaha gobierno a cambia e fecha di reapertura, y awor SKOA mescos cu tur otro directiva di scolnan na Aruba, ta wardando pa tende ki dia porfin scolnan lo habri na Aruba. Asina su director Anuesca Baly a bisa noticiacla.com diamars. E decision mester bin di minister di Enseñansa Rudy Lampe y e crisis team. Y ya cu SKOA a traha delanta, e lo no ta hopi trabou pasobra e plan di nan ta cla y tin cu djis adapta esaki cu e plan di crisis y di gobierno. 

NO PREPARA PA COVID19

Baly ta admiti cu ningun scol na Aruba tabata prepara pa e situacion aki unda cu di un dia pa otro scol a cera y unda cu gobierno a ‘duna opcion’ pa practica e asina yama ‘online learning’, osea duna les for di cas of na cas. Paisnan grandi manera Hulanda no tabata mucho problema pasobra pa hopi tempo caba nan ta trahando cu e sistema digital aki. Pa Aruba, esaki tabata algo practicamente nobo. Pregunta segun Baly, ta si  implementando e metodo ‘nobo aki’ na Aruba, ki tipo di calidad di enseñansa esaki lo bira y si esaki ta igual na duna les na scol den un lokaal. Riba esaki Baly su contesta ta un simple ‘no’. “No ta tur mucha nan ‘begin situatie’ ta mescos” Baly ta cuminsa splica. Cu esaki, e kier men cu tin mucha cu tin su mesun camber y facilidad unda cu siña asina ta mas facil, mientras cu otronan no tin e mesun fortuna. Pa e ultimo aki, e enseñansa asina (na cas den forma digital) lo no funciona. E ta un realidad di hopi cas cu no tin e forma adecua pa duna les of haya les na cas manera cu ta ser rekeri. “Nos no por sconde esey y bisa cu no ta asina” Baly ta sigui bisa. 

ENCUESTA

E director ta referi na un encuesta cu a haci entre e mayornan pa sa e situacion di facilidad pa por haci ‘online learning’. E encuesta ta puntra p.e. cuanto mucha tin aparato (device) manera computer of laptop, bon comunicacion di internet etc. E encuesta no ta cla debi cu e ta uno basta grandi, pero ya tin riba 3 mil respuesta (1/3 parti) y por saca afor caba cu no mas cu 40% di e casnan tin internet confiabel. “E ora bo ta puntra bo mes, kico bo ta dunando como enseñansa” Baly ta bisa. E ta sigura cu e ta pro digitalisacion, pasobra SKOA ta frontrunner, pero den lokaal na scol. Esaki pasobra esey ta haci e les mas atractivo pa e muchanan y docente. Pero esey no necesariamente kier men cu na cas tambe e lo funciona. Digitalisacion no mester trece desigualdad social bou di alumnonan.

HABRI SCOL BEK

Mientrastanto SKOA, mescos cu otro directivanan di scol na Aruba, kier haya un fecha exacto di ki dia scolnan na Aruba lo por habri atrobe. Ya ta di 4 biaha cu ta pospone e fecha proponi, y esaki ta crea un incertidumbre no solamente pa docente y alumnonan, pero tambe pa directivanan di scol y mayornan. Y den e asunto di reapertura di scol, Baly ta compronde e punto di e sindicato SIMAR cu a bisa noticiacla.com caba cu nan ta pro e decision pa tene scolnan cera. Esaki pasobra kier sa cu ora cu scol habri bek, kico lo ta e protocol cu e scolnan mester sigui. “Bo no por bin bisa 5 pa 12 cu mayan scol ta habri y bo no a prepara e schoolbestuurnan pa bay prepara con e scolnan ta habri” Baly a bisa. Como tal den e parti ey, e ta comparti e opinion di SIMAR pa no habri scol ainda. “Mi tin cu bisa si, cu como schoolbestuur responsabel, nos di SKOA (mescos cu nos a traha na veiligheids protocol pa e School Examens por a tuma lugar e siman aki), interno cu cabesantenan a traha diferente denk tank pa sa kico ta bira e noodplan pa ora cu scol habri bek y dia cu minister dilenea nan plan pa habri scol. SKOA no a warda y a traha nan plan y banda di esaki, lo sigui yena e ‘raamwerk’ cu DVG y gobierno stipula pa loke ta reapertura di scolnan”. 

CUANTO MUCHA DEN KLAS

Un di e preguntanan cu SKOA tin p.e. ta con lo atende cu e regla (carta) cu a keda poni for di un par di lunas atras (aña pasa juni)  y cu a ripiti atrobe algun siman atras, unda cu ta bisa cu docentenan cu ta penshonado no mag di traha, mester tin 28 alumno den klas, etc. E pregunta cardinal segun Baly ta si mester tin 28 mucha den klas ainda awor cu e situacion nobo cu COVID19 a trece cu ne? “Con bo ta bay resolve esey si bo tin social distancing? Kico bo ta verwacht di e school besturen pa haci?” Baly ta puntra su mes. Ta sigui parti dos.