Caso nobo positivo ta di un persona cu ya tabata den cuarentena

ORANJESTAD – E caso nobo positivo di coronavirus na Aruba diamars, ta di un persona cu ya tabata den cuarentena. Por lo menos asina DVG ta raporta diamars anochi pa medio di un comunicado. Manera ta conoci, despues di 13 dia sin conose mas caso positivo di COVID-19 na Aruba awe nos  a wordo informa di un caso positivo nobo. E caso positivo nobo aki tin vinculo cu un otro caso positivo y ta trata aki di un persona cu ya tawata den cuarentena y ta pasa awo di cuarentena pa isolacion. SInembargo, for di e cifra di awe y un dia anterior, e cantidad di cuarentena no a cambia. Pero e parti aki no a keda clarifica pa DVG ainda. 

 Na e momentonan aki tur desicion tuma pa cu e Fase 1 di recuperacion di Aruba su Economia y Futuro ta canando segun plan di gobierno. Mientras e dianan ta pasa poco poco comunidad ta cuminsa move mas, y e posibilidad tey cu e cantidad di casonan di COVID-19 por aumenta. Esaki tambe ta parti di e Normal Nobo rond mundo. Aruba a scohe pa habri su economia den fase pa di e forma aki por controla e riesgo. Despues di 2 siman ta evalua con e simannan a bay pa dicidi si mester ahusta e maneho.

Segun DVG, nan ta sigura cu comunidad por move mas awor sinembargo ta hopi importante pa tur hende sigui ta alerto y practica e reglanan di distanciamento fisico y di higiena pa proteha bo mes na tur momento.