Rhuggenaath: Corsou ta habri bek internamente diabierna awor

WILLEMSTAD – Corsou ta ‘habri bek’ internamente entrante diabierna proximo 8 di mei 2020. Scolnan ta habri tentativamente 18 di mei proximo. Asina prome minister Eugene Rhuggenaath a anuncia diamars merdia durante un briefing riba coronavirus COVID 19. Ta bisa internamente pasobra e frontera ta keda cera te proximo aviso. E habrimento ta ensera entre otro cu tur compania na Corsou por habri bek, basta mantene distancia social y cumpli cu regla di higiena. 

KICO MAS

Deporte (incluso competencia sin publico), landamento y cuido di sernan keri (mantelzorg) por tuma lugar entr 6-am 8pm. Reglanan actual pa restaurant, truk di pan (delivery y take out) agencia funeraria, supermercadonan y hardware ta keda vigente. Entrante diabierna, tur hende por move libre atrobe den trafico y ta cancela e regla di plachi di dia. Pa diadomingo tambe. No por tin mas cu 25 hende den grupo. Por lo pronto no ta duna permit pa organisa evento publico. Toque de Queda ta keda vigente entre 9pm y 6am.