Premier Eman yegando 100 ora cu welga di hamber

ORANJESTAD - Despues di tin 100 ora sin come, premier Mike Eman ainda ta riba pia, y hunto cune, dos parlamentario Clarisca Velazquez y Desiree Croes. NoticiaCla a papia cu tur tres diamars mainta y tur tres a sigura cu nan ta bayendo bon ainda. Un otro persona cu tambe tabata parti di e grupo a bay hospital marduga pasobra e si a bira malo. "Nos no a stop te ora cu gobernador firma e documento" e dos damasnan a bisa. Eman a sigura NoticiaCla cu e la tuma nota di e contestanan di Plasterk y cu e la referi na e accionan awor di D66 cu a exigi pa haya un opinion oficial di Raad van State riba e asunto. Fisicamente Eman tabata mustra bon, drumiendo riba un cama bou di un tent, companja pa coleganan Sevinger,(Paul) Croes y (Mike) de Meza. Algun rato prome Eman a forma parti di e conseho di minister den e sala di Fort Zoutman. Tanto Eman como e dos parlamentarionan a desmenti rumornan cu nan lo a dicidi cu nan ta stop. "Esey no ta berdad. Absolutamente!".