Tjon: Ta evaluando uso di señal di cellular pa midi movecion pa cu COVID 19

ORANJESTAD – E crisis team di Aruba relaciona cu e crisis di coronavidus, ta evaluando pa aplica e mesun sistema cu tin na Corsou,- esta di usa señal di cellular pa midi e movecion di nos hendenan riba caya-, pa yuda cu decisionan riba medidanan cu mester wordo tuma of suavisa relaciona cu p.e. Toque de Queda y Shelter in Place. Asina alto inspector interino Vanessa Tjon-Kock a confirma pa noticiacla.com dialuna anochi durante e COVID19 briefing. “ Ta berdad (cu) e parti cu ta trata cellular, ta un punto cu a yega di bin dilanti den e reunion” Tjon a cuminsa na bisa, refiriendo na reunion di crisis team di Aruba riba e tema di coronavirus. “E ta algo berdad cu nos por considera” e ta sigui bisa. 

CON E TA FUNCIONA

Via celcites, por mira cuanto movecion tin di hende, y unda cu esaki ta concentra. Cu esaki por midi si e pueblo ta aglomera na cierto caminda si of no. Aki a bin nota na Corsou p.e. cu hopi tabata cumpli cu e regla di Shelter in Place, pasobra mayoria hende tabata na cas. Mientras cu Aruba a considera pa usa e metodo aki, tin cosnan cu segun Tjon, enberdad mester tene na cuenta. “Bo tin cu tene cuenta tambe cu e platform. Dus e technische structuur. E structura technico kico bo ta bay capta y bo tin cu tene cuenta cu leynan existente” Tjon a bisa. Ta conoci cu tin ley di privacidad, pero den tempo di emergencia, un gobierno por surpasa esaki. “Berdad Corsou ta haciendo uso di esaki. Mi no tin detayes di e forma con nan ta acumula informacion tocante di esaki, pero lo ta bon pa nos por trece dilanti den e reunion un biaha mas”.