Simar ta di acuerdo cu Lampe pa no habri scol ainda

ORANJESTAD – Sindicato di maestro SIMAR ta di acuerdo cu minister a dicidi pa pospone reapertura di scolnan basico te proximo aviso. Asina presidente di e sindicato Josephine Albertus a bisa noticiacla.com dialuna anochi. E ta confirma cu el a papia cu e mandatario siman pasa y a splik’e e situacion. E punto principal pa SIMAR ta cu ainda no por garantisa bienestar pa e maestronan. 

PAKICO NO POR HABRI AINDA

Segun Albertus, e tin di haber pues cu e seguridad y bienestar di e docentenan. E asunto di social distancing, e lokaalnan chikito cu no ta mucho adecuado etc. Si kier cambia e sistema di les, cu ta nifica p.e. tal grupo (cantidad di mucha) ta bay scol riba tal dia, Albertus ta considera cu aworaki e tempo ta mucho cortico (pa regla tur esey). “Bo mester a cuminsa esey mas delanta. E docentenan mester haya e guia y tempo. Dus aworaki pa djis bisa bo ta habri scol, ta bay bira chaotico” Albertus a bisa. Como tal, e ta di acuerdo cu e decision ey di minister Lampe. 

MESTER DI PLAN

“Tin cu traha riba con nos kier wak scol ora cu scol habri bek, kico ta e rekisimentonan, anto for di eynan sigui traha. No djis core habri scol pa habri scol. Pasobra despues ta nos, ta e maestronan ta bay ta esunnan cu dolor di cabez”, Albertus a sigui bisa. Ademas, segun e presidente di e sindicato, no tin garantia cu muchanan cu ta na cas awor, ta bay bin scol cu e virus. “Nan ta bay hunga cu otro, nan ta touch otro toch, nan ta bay bek cas cu ne. E ta bay bira un chaos”. Albertus ta uza Dinamarca como ehempel unda cu eynan a cuminsa scol bek, y awor e cantidad di pashent di covid a subi bek atrobe. E ta mustra cu na Hulanda mes no ta eens pa habri scol pasobra e ta manera un proefkonijn, pa wak si ta bay logra si of no.