Wever: Ta considera acusacion di Venezuela den direccion di Aruba hopi serio

ORANJESTAD – Gobierno di Aruba ta investigando e loke a sosode diadomingo na Venezuela relaciona cu un posibel yegada di un grupo di mercenario terorista. Prome minister di Aruba Evelyn Wever a confirma esaki pa noticiacla.com dialuna anochi durante e briefing di coronavirus. “Nos a wordo informa di esaki y nos mes a scuchele y a tuma nota di e informe” Wever a bisa. “Ta considera e tema aki uno hopi serio pasobra tin acusacionan serio ta biniendo den direccion di Aruba” e prome mandatario a sigui bisa. E ta den comunicacion estrecho cu Hulanda y Venezuela riba e tema aki y lo warda e relato di e investigacion. 

E CASO

Tabata dialuna mainta cu noticiacla a raporta e hecho cu Venezuela a alerta Hulanda riba e uso di Aruba pa ‘presta apoyo logistico y di fueling pa gruponan mercenario terorista. Diadomingo e vice presidente Delcy Rodríguez a reuni cu e embahador di HulandaNorbert Braakhuis riba e tema ey. Mes momento Rodriquez a informa  di duna prueba nobo cu tabatin un incursion frustra paramilitar den e estado di La Guajira, planea pa Merca y ehecuta pa Colombia. E intencion segun Rodriguez, tabata pa deroca presidente Nicolas Maduro, mei mei di e crisis di COVID 19. Rodriquez a bisa esaki durante su briefing diario riba e crisis diadomingo na television nacional di e pais. 

E INCIDENTE 

Segun Rodriquez, varios mercenario den boto a purba subi tera, guia pa un conocido mercenario Mericano Jordan Goudreau. Goudreau pa medio di un video, lo a confirma, segun Rodriguez, cu e eventonan di diadomingo tabata real y cu e ta tras di esaki. A confirma tambe cu su forzanan special a keda activida den parti sur, west y oost di Venezuela.