Lampe: Scolnan na Aruba ta keda cera despues di 11 di mei por lo pronto

ORANJESTAD – Scolnan na Aruba no ta habri dia 11 di mei mas, manera inicialmente a wordo bisa. Asina e mandatario responsabel pa e cartera di enseñansa Rudy Lampe a bisa durante e briefing di dialuna merdia. “Por el momento nos a dicidi cu e scolnan ta keda cera te proximo aviso” Lampe a bisa. “Nos ta den deliberacion cu directie volksgezondheid y cu minister di salud publico ta yegando na un acuerdo riba e reglanan cu ta bay conta pa ora cu habri bek nos scolnan”. Noticiacla.com a compronde sinembargo, cu e mandatario a bay contra e decision di habri scol bek. Den e proximo aviso lo bin mas informacion, con gradualmente ta bay start e reapertura di e scolnan. Loke si ta sigui ta e examens cu a cuminsa dialuna mainta cu ta sigui te diabierna. E mandatario no a bisa kico tabata e motivacion pakico e scolnan ta keda cera.