Corte ta sigura cu huesnan ariba ningun manera ta influencia casonan di nan famia

ORANJESTAD - Huesnan ariba ningun manera ta influencia casonan di nan famianan. Asina corte di husticia di Aruba a raporta dialuna atardi den un comunicado. E comunicado ta referi na e publicacionnan recientemente den prensa tocante un desalohamento di un cas. E caso specifico aki ta trata ruman di un huez comisario na Aruba di fam Y. E ruman, un notario di profesion lo tabata envolvi den e caso aki di alohamiento. Segun corte, e veredictonan ariba cual e desalohamento ta basa (veredicto di e kort geding di 30 di oktober 2019 [1] y 25 di maart 2020 [2]) no a wordo pronuncia door di un familiar di un di e partidonan. “ Huesnan nunca ta trata caso di nan famianan y ariba ningun manera ta influencia casonan pendiente na Corte di nan famianan” e comunicado ta sigui bisa. “ Esaki ta salvaguardia den e codico di comportacion di huesnan, e asina jama gedragscode rechterlijke macht, cual ta publica ariba e website di Corte Comun di Husticia” e comunicado ta finalisa bisando.

E CASO

E caso a hala basta atencion den prensa y rednan social, unda cu un famia a wordo desaloha di e cas, cu lo ta pertenece tambe na e notario. Mesora riba rednan social a cuminsa core rumor cu lo tin influencia hudicial den e caso aki, pa cual corte a haya ta bon pa aclaria e asunto dialuna pa medio di un comunicado.