Cuerpo policial a suspende total di 9 agente policial

ORANJESTAD – Un total di 9 agente policial a keda suspendi dialuna relaciona cu ‘un investigacion’ cu ta andando. Asina vocero policial Lito Laclé a confirma dialuna merdia. Ta trata di un caso cu a sosode siman pasa na un cas na Noord, unda cu lo a haya e grupo di polis aki den un forma no corecto. Ta papia di un posibel fiesta cu lo a bay ‘robez’. A prohibit entrada na tur localidad di polis pa e polisnan en cuestion te proximo aviso. 

E CASO

Manera cu noticiacla.com a raporta anteriormente, siman pasa alto comisario interino di polis Vanessa Tjon durante un briefing di coronavirus, a confirma cu enberdad ‘algo’ a pasa y cu ta investigando un grupo di polis. Mas no por a bisa riba e tema ya cu e ta ‘bou di investigacion’. Mas prome den dia, vocero di polis a confirma cu polis a inicia un investigacion riba e caso basa riba publicacion di e portal Solo di Pueblo. E portal aki a raporta cu hunto cu un grupo di mas polis, e polis y ex parlamentario Clarissa Velazquez tabata envolvi den un fiesta cu boroto y cu bebemento excesivo. E persona en cuestion a refuta e suseso grandemente riba su pagina di facebook, indicando cu ta trata di un persecucion politico, mirando cu e tabata un parlamentario di partido di oposicion (AVP) un tempo, y e medio en cuestion (SDP) ta bin di e banda di e partido den gobierno (MEP). 

En Conexion cu e sucedido recientemente na Noord , Cuerpo Policial  a cuminsa un investigacion interno. Den cuadro di e investigacion andando alto mando a tuma e decision di prohibi entrada na tur lokalidadnan di polis di un total di  9 colega di Cuerpo Policial. 

Na e momentonan aki no lo por divulga mas informacion .