Director di DVG ta gana mayoria punto den caso contra minister

Director di DVG ta gana mayoria punto den caso contra minister

Posted on 05/4/2020 9:21 am AST | Updated on 05/4/2020 9:27 am AST

ORANJESTAD – Corte a elimina practicamente tur ‘barera’ impone pa gobierno di Aruba (lesa: minister Dangui Oduber di Salud) dialuna contra e actual director di Directie Volks Gezondheid (DVG) Jerry Staring. Den un sentencia di 14 pagina,e huez ta declara 4 di 5 decision di minister como rechasa, kitando tur posibel ‘limitacion’ pa e director. Abogado di Staring, David Kock di bufete DKLegal a confirma esaki dialuna mainta. Segun Kock, cualkier ‘limitacion’ na Staring awor mester keda elimina. 

PUNTONAN

E cuater puntonan cu huez a destrui den su sentencia ta entre otro e decision di minister di 21 di mei 2019 cu Staring lo mester a traha como coordinador na Bureau Ondersteuning Verslavingszorg (BOV), e decision di minister di dia 22 di mei 2019 cu e no tabatin ningun autoridad y tampoco por a firma mas. E decision di minister di dia 24 di mei 2019 di prohibi Staring di drenta DVG tambe a keda destrui. Y finalmente e decision di minister di dia 25 di juni 2019 cu e ta prohibi pa eherce su funcion como director riba e personal of relaciona cu e rapport di formacion y pa tin apoderacion pa cera contract cu tercera parti. E unico cu huez a rechasa di Staring, ta esun di 15 di maart unda cu e minister a prolonga e decision pa Staring traha como coordinador, cu 12 siman. Segun su abogado, esaki ta algo cu a pasa caba pues no ta relevante. 

REACCION MINISTER

Awe mainta, ora cu a tuma contacto cu e mandatario, el a informa cu e no a tuma nota ainda di e veredicto. Keda pendiente pa su reaccion durante curso di dia. 

Por lesa e sentencia completo AKI

  • Corte ta culpa gobierno cu ainda no por registra pareha di mesun sexo den union civil

    Corte ta culpa gobierno cu ainda no por registra pareha di mesun sexo den union civil

    ORANJESTAD – Gobierno di Aruba ta actuando ilegal door di no permiti registracion di union civil di parehanan di mesun sexo. Asina corte a dicta diaranson den un sentencia entama pa fundacion Orguyo y dos dama. Segun corte, mester por permiti parehanan di mesun sexo pues pa registra nan union, mientras cu ainda no ta permiti matrimonio di mesun sexo. Ademas, corte ta haya incorecto cu e concepto di ley pa acepta e union civil entre pareha di mesun sexo, ta pega na Parlamento pa tres aña caba, creando duda y unda cu pues no tin claridad riba e asunto aki. Di otro banda, corte ta bisa cu no por forza gobierno pa pasa e ley aki y adapta esaki, pasobra e no tin e competencia aki. Pero si, cu gobierno ta haci su mes culpable na discriminacion contra parehanan di mesun sexo. Lesa e sentencia completo AKI. 

  • Legalidad y proporcionalidad di toque de queda cuestiona

    Legalidad y proporcionalidad di toque de queda cuestiona

    ORANJESTAD – Orden di abogado, ta cuestiona e legalidad y proporcionalidad di e toque de queda cu gobierno a impone. Asina su presidente, abogado Ronny Wix ta bisa diasabra den un comunicado. E orden ta cuminsa na señala cu e toque de queda a keda prolonga atrobe. E base di e argumento di e orden, ta cu constitucion di Aruba ta garantisa e libertad di movimento y ta ancra den dje. Berdad cu por impone e toque de queda segun un ley, pero asina mes e gobernante ta mara na principio di proporcionalidad y subsidiaridad. Pues ni masque e tin derecho segun ley, mester evalua si e por logra mesun meta sin e regla di toque de queda. Y no ta na discussion si e toque de queda ta viola e libertad di movimento. Y como tal e orden ta preocupa riba e legalidad y proporcionalidad di e regla. 

  • Serlimar a haya proteccion di pago pa evita bancarota

    Serlimar a haya proteccion di pago pa evita bancarota

    ORANJESTAD – E compania sui generis Serlimar a haya proteccion di pago temporal (voorlopig surseance van betaling), inmediato (entrante 19 di mei 2020) cu ta un proteccion di corte pa evita posibel bancarota. Hues a dicta esaki ayera riba peticion di su abogado David Kock (DKLegal). Como administrador a nombra abogado Geert Rep. Corte lo dicidi riba 26 di augustus 2020 si e proteccion ta bira uno definitivo. 

  • Clarisca Velasquez a entama caso pa kita su suspension como polis

    Clarisca Velasquez a entama caso pa kita su suspension como polis

    ORANJESTAD – Clarisca Velasquez su abogado Desiree de Sousa Croes a entama un caso sumario pa suspende e suspension cu cuerpo policial tin riba su cliente. Asina de Sousa Croes a confirma na noticiacla.com dialuna atardi. “ Diabierna mi entrega un bezwaarschrift contra e desicionnan tuma door di Korpschef den nomber di mi cliente Clarisca Velasquez” De Sousa Croes a cuminsa bisa. 

  • Comerciante Ralph M. a recobra su libertad awe merdia

    Comerciante Ralph M. a recobra su libertad awe merdia

    ORANJESTAD – Conocido comerciante Ralph M. a recobra su libertad awe merdia despues cu el a keda presenta dilanti Huez Comisario. E lo mester presenta durante un tom zitting durante luna di juni proximo pa responsabilisa su mes pa su actonan pa cual e ta wordo acusa. Vocero di ministerio publico Ann Angela a confirma esaki pa noticiacla.com. E siman aki el a keda deteni pa aggression y destruccion, na momento cu el a confronta reportero Nelson “Speed’ Andrade di 24ora.com cu esaki tabata haci raportahe live dilanti cas di ex minister Otmar Oduber, cu tabata atende cu su cas di cual su cushina tabata na candela. Dado momento Oduber a pidi Andrade pa respeta su cas y no filma mas. Su tras a bin amigo di Oduber, M. unda entre Andrade cu M. a surgi un aggression. Polis a detene M., y Andrade a denuncie pa maltrato y destruccion. 

  • Corte ta sigura cu huesnan ariba ningun manera ta influencia casonan di nan famia

    Corte ta sigura cu huesnan ariba ningun manera ta influencia casonan di nan famia

    ORANJESTAD - Huesnan ariba ningun manera ta influencia casonan di nan famianan. Asina corte di husticia di Aruba a raporta dialuna atardi den un comunicado. E comunicado ta referi na e publicacionnan recientemente den prensa tocante un desalohamento di un cas. E caso specifico aki ta trata ruman di un huez comisario na Aruba di fam Y. E ruman, un notario di profesion lo tabata envolvi den e caso aki di alohamiento. Segun corte, e veredictonan ariba cual e desalohamento ta basa (veredicto di e kort geding di 30 di oktober 2019 [1] y 25 di maart 2020 [2]) no a wordo pronuncia door di un familiar di un di e partidonan. “ Huesnan nunca ta trata caso di nan famianan y ariba ningun manera ta influencia casonan pendiente na Corte di nan famianan” e comunicado ta sigui bisa. “ Esaki ta salvaguardia den e codico di comportacion di huesnan, e asina jama gedragscode rechterlijke macht, cual ta publica ariba e website di Corte Comun di Husticia” e comunicado ta finalisa bisando.

  • Powered by SETAR