Tjon-Kock: Enberdad tin un sucedido a tuma lugar cu diferente miembro di cuerpo policial

ORANJESTAD – Alto comisario interino di polis Vanessa Tjon-Kock a admiti diahuebs anochi durante e briefing di coronavirus, cu ‘enberdad tin un sucesido cu a tuma lugar cu diferente miembronan di cuerpo policial’. Cu esaki e ta referi na e noticia cu a core henter dia di un grupo di polis haya den un cas cu lo ta haci desordo y cu lo tabata bebi. Anteriormente vocero di polis a informa cu tin un investigacion andando, mientras cu despues un di e polisnan envolvi den e ‘suceso’, a desmenti e raportahe anterior. Pero awor contrario na e declaracion di e polis en cuestion, mando policial mes a admiti cu 'algo' a sosode cu ta envolvi un grupo di polis y cu ta investigando e asunto. 

INVESTIGACION

Ademas segun Tjon, ta acumulando tur informacion necesario pa asina por wak e trayecto cu e personanan aki (e grupo di polis envolvi) tin cu cana interno. E no por a divulga ningun informacion specificamente pa loke ta trata e sucedido, ni cua colega, ni kico a pasa. A admiti cu tin varios version riba medionan social. “Pesey mi lo no desmenti ni duna bevestiging dus den e caso aki tampoco di kico tin y kico no tin” Tjon a sigui bisa. 

VOCERO TA CONFIRMA

Vocero di polis Lito Laclé a informa diahuebs merdia cu e investigacion riba e caso aki enberdad a sosode. E ta referi na e articulo cu a sali riba e portal Solo di Pueblo diahuebs unda cu supuestamente un grupo di polis lo tabata festeha den un apartamento den oranan di anochi. E relato ta papia di cu patruya lo a duna asistencia, lo a topa cu e grupo di colega aki den estado no corecto. Mester bisa cu e rapport policial cu noticiacla.com a ricibi di e anochi, no ta cubri e parti di marduga pa wak si esaki a keda raporta. 

REACCION 

Mientrastanto un rato despues, e polis en cuestion (Velasquez) a reacciona riba su pagina di Facebook, indicando cu e informacion aki no ta cuadra cu berdad y cu interesnan politico partidario kier susha su bon nomber. E ta sigura cu e articulo riba e portal menciona no ta cuadra cu berdad. E ta desmenti cu polis a wordo dirigi na e cas en cuestion. Mientras cu e no ta bisa kico berdad a pasa, of cu si tabatin un fiesta of no, e ta sigura cu ‘ningun momento tabatin musica duro of desordo’. E ta Loke a pasa segun Velasquez ta cu despues el a sinti malo marduga, el a bay Imsan marduga unda cu a consehe pa e yama e liña di COVID 19, (e liña pa meld si bo tin simptoma di coronavirus COVID 19), cual el a haci tambe segun su version. E ta lamenta cu e secreto medico di dje ta riba caya. Ademas e ta cuestiona cu informacion ‘interno’ na cuerpo policial lo a sali riba caya. “Yesaki mester haci investigacion urgente pa saca afo ken por a duna prensa informacion”. No ta conoci ki informacion e ta referi na dje aki, si ta e melding contra dje of e hecho cu el a yama e liña di COVID 19. Lesa e declaracion completo di Velazquez AKI.