Famia cu a perde tur cos den candela di cas awe marduga, mester ayudo

ORANJESTAD – E cas cu a kima awe marduga na Macuarima, a laga un famia completo desampara. Mientras cu tur famia ta ocupa cu preparacion pa sea noche buena of celebra Pasco mayan, tin un famia cu tin otro preparacion mas urgente; sa con nan lo bay sobrevivi e proximo dianan y con pa drenta aña sin nada. Ta bon cu for di momento cu e incidente a tuma lugar, famia y conocirnan a cay aden y a cuminsa mobilisa pa asisti e famia (Geerman) pa nan por sikiera pasa un pasco decente y e resto di dianan di fiesta. Manera cu NoticiaCla.com a compronde, e famia a perde practicamente tur material, paña, y a scapa solamente loke nan tabatin cu nan cu ta celular y laptop. Tur resto, a bay perdi den e candela feroz.

Un biaha mas por a nota cu facebook ta funcionando como un auxilio efectivo, haciendo yamada riba tur hende cu por yuda cu algo pa e famia por sobrevivi e dianan aki nos dilanti, te ora un ayudo mas structura y duradero keda cla. A compronde cu a haya ya caba un cantidad di paña y otro artefactonan. Mientrastanto NoticiaCla.com a compronde cu e famia mes ta kedando awor serca un otro familiar na Macuarima mes. Pa loke ta e tata di famia, cu ta un miembro di cuerpo di bombero, a sostene kemadura di segundo grado na su curpa. Riba facebook por a nota cu ta pidiendo pa donacion na Famia Geerman, y cu por jama Sra. Julia Dirksen na: 5672952. NoticiaCla.com a confirma e number aki tambe. NoticiaCla.com a compronde cu lo tene un evento di fundraising, mientras cu un establecimento mesora a yuda cu paña di urgencia pa e famia por move e dianan nos dilanti. Tambe NoticiaCla.com tin informaicon cu por pasa DOWCO Santa Cruz of laga serka cualkier bisiña serka di Macuarima 9A. Na oficina di Bon Dia Aruba tambe por pasa laga articulonan riba dia 26 di december for di 10AM. Esaki pasobra un di e victimanan ta traha na Bon Dia Aruba. Si haci donacion di paña, please yuda cu sizenan L cu XL, sapatonan pa homber y muhe size 9 y 10. No mester di paña of articulo di mucha.Home appliance tambe ta welcome.

Tabata awe marduga cu un cas di palo na Macuarima a kima por completo. Pa mas o menos mey anochi, tres truck di brandweer a wordo manda cu hopi urgencia na un adres, na Macuarima, caminda un cas di palo ta completamente na candela. Na yegada nan a topa enberdad cu e cas full na candela y e candela tabata mensando algun auto staciona banda di e cas. Segun un habitante, nan lo a haya holo di candela y mesora a drenta saca e mama. Manera cu nan a saca e mama, e candela a expande hopi lihe mes. Tabata tin varios explosionnan fuerte cu bisiña nan tabata tende tras di otro. Brandweer hopi lihe a sa di controla y combati e candela. E doño di e cas a ricibi varios kemadura na su brasa y lomba. Ambulance a yega na e sitio y despues di a trata e homber nan a dicidi di transporte pa hospital, mirando cu su kemaduranan aparentemente lo ta di segunda grado. Foto cortesia Janeth Orozco.