AZV den problema financiero serio debi na crisis COVID 19

ORANJESTAD – AZV tambe tin problema financiero serio debi na e crisis di coronavirus COVID 19. For di documentonan den poder di e portal aki, nan (AZV)  a bay asina leu di informa esnan de un reunion na comienso di e luna aki cu pa e fin di e luna aki (e siman aki) lo tabatin chens di no por a cumpli cu su obligacionan financiero.     Minister responsabel pa AZV, Dangui Oduber a confirma e situacion awe mainta pa e portal aki. ” (E) situacion financiero di pais Aruba ta hopi delicado y esaki ta conta pa e fondonan di AZV tambe” segun Oduber na e portal aki. Mientrastanto director di AZV Ruben Goedhoop a confirma awe mainta cu AZV a logra paga su obligacionan di april. E otro lunanan, sinembargo segun e director, lo keda un reto. 

REUNION

For di e mesun informacion cu e portal aki tin den su poder, durante e reunion na comienso di e luna aki e compania a manda señal cu tin un deficit structural na caminda. A mustra cu legalmente AZV por fia solamente 1 miyon florin, cu ta un pipita riba e plachi cayente pero no por haci mucho mas pues e lo no yuda nan situacion casi nada. Debi na e crisis di coronavirus, entrada na e.o. BAZV a baha drasticamente. Y AZV ta mustra cu mirando cu prestamo no ta posibel y cu nan lo mester haya ayudo di Hulanda. “Na momento cu 37.000 hende ta perde trabou, poder di compra bai atras y negoshinan ta cera y no ta pagando impuesto pasobra no tin benta naturalmente, e ta crea un presion financiero den tur sentido di palabra” Oduber a continua bisa. Esaki ta cuadra cu e declaracion di director di AZV. “ Entradanan di AZV for di BAZV y prima a keda hopi atras. Nos ta den contacto estrecho cu directie financien pa cu e situacion financiero” segun Goedhoop awe mainta.  Mientras cu e ta confirma cu a logra haci pagonan di april, no tin garantia pa e lunanan nos dilanti. “Nos a logra paga tur cliente conforme e schedule regular. Esey ta bon noticia. Pero pa e proximo lunanan, enberdad tin hopi incertidumbre (financiero)”. Cu e situacion ta delicado, minister Oduber tambe a confirma pa e portal aki. E mandatario ta mustra cu ta pesey gobierno mester di e prestamo di gobierno Hulandes pa por cumpli cu su obligacionan y asina mes mester reduci gasto drasticamente.

SOLUCION

E portal aki a compronde cu durante e mesun reunion na comienso di e luna aki, AZV a cuminsa evalua varios scenarios unda cu por percura pa e cuido medico keda lo menos afecta posibel. Ta pensando entre otro riba posponemento di cierto pagonan, pa asina por mehora e cashflow di e compania. Un solucion manera cu a menciona anteriormente, ta ayudo financiero di Hulanda. Problema ta cu e ayudo por dura pa yega y keda ehecuta, y AZV mester di e placa awor. Y AZV como tal ta spera un dip financiero aki 2 pa 3 luna. Esaki por tin consecuencia entre otro pa cu e proveedornan di botica’s. E portal aki a compronde di varios instancia cu ta depende di pago di AZV, cu nan ta hopi preocupa pa esaki y ta ‘wonder’ con AZV lo por resolve e asunto aki. Ademas ta cuestiona e hecho cu mirando cu nos ta den un crisis medico, ta haya cu e situacion medico mester haya prioridad riba otro cosnan aworaki. 

DIGITAL

Mientrastanto segun Goedhoop, AZV ta sigui provee servicio na comunidad, cu ta posibel debi cu nan a bay completamente digital. A pidi pa download e AZV app, pa asisti cu eventual preguntanan cu por tin of asistencia di prueba di seguro pa asistencia medico.