Wever: Tin tur confiansa cu nv’nan di gobierno tambe lo reduci salario

ORANJESTAD – Prome minister di Aruba Evelyn Wever no tin indicacion cu e tin cu tuma un decision ehecutivo contra nv’nan di gobierno pa cumpli cu e peticion haci na nan, mescos cu a haci diabierna contra sindicatonan. Asina prome minister Evelyn Wever Croes a contesta noticiacla.com diamars anochi durante e briefing di coronavirus.  E peticion di gobierno tabata pa esnan den e nv’nan reduci nan salario conforme e peticion haci na nan. Varios lo a te hasta duna nan palabra caba y ta haciendo e tramitenan necesario. 

CARTA

E mandatario a manda un carta pa 20 nv di gobierno diabierna ultimo cu e peticion pa reduci salario y beneficio mescos cu gobierno mes a haci. Ta trata di reduccion di 20% di salario y beneficio, y 12.6% respectivamente, den cuadro di e crisis di coronavirus COVID 19. “Nos no a haya reaccion di tur ainda, pero mi no tin un indicacion cu ta necesario pa nos bay un paso mas leu”. Cu e paso mas leu, Wever ta indica mas sigur cu e ta referi na e decision ehecutivo cu el a tuma diabierna ultimo ora cu e no por a yega na un consensus cu tur sindicato riba e tema. Riba esaki, e portal aki a puntra cu si e nv’nan resisti, si tambe lo haci mescos. “Mi tin tur confiansa cu e companianan estatal lo cumpli cu locual nos a pidi nan” Wever a sigui bisa.