Wever: Lo mester yega na acuerdo cu director prome cu aplica WeverCroes norm

ORANJESTAD – Gobierno lo aplica e asina yama ‘WeverCroes Norm’ contra tanto directornan actual como esnan nobo. Asina premier Evelyn Wever Croes a contesta noticiacla.com  diamars anochi durante e briefing riba coronavirus. Siman pasa e mandatario a indica cu e lo implementa esaki, den cuadro di e crisis di coronavirus. E norma ta igual na esun di Hulanda cu ta cu un director no por gana mas di 130% di salario anual di un prome minister. Di otro banda, e mandatario ta admiti si mesora cu pa esaki logra, mester tin un acuerdo cu e director prome. 

LEGAL

E pregunta ta basa riba un investigacion y publicacion di e portal aki diamars, cu ta mustra cu gobierno por haya dolor di cabez cu directornan di nv di gobierno cu tin un contract specifico. Consecuentemente segun e investigacion, no ta asina asina por yega y impone e norma nobo. Algo cu ayera Wever Croes a admiti tambe na e portal aki. “Pero naturalmente nos conoce nos leynan. Y si bo tin un director actual cu tin un arbeidsovereenkomst y e no ta bay di acuerdo (cu implementacion di e norma nobo), bo tin cu yega na un palabracion cu ne” Wever a bisa. “Bo no por yega cambia overeenkomsten cu contractonan laboral cu ya caba ta den efecto”. 

TUR DIRECTOR

Ademas, tambe contestando mas pregunta di e portal aki, Wever a confirma diamars cu e norma ta conta pa tur director di e companianan, pues no solamente e director general of statutorio, sino tambe esnan p.e. financiero of mas, conforme e forma con e compania ta inscribi na Camara di Comercio. 

ANCRA DEN LEY

Di otro banda, e mandatario a bisa tambe cu e norma nobo lo ta ancra den un ley, pues den e caso aki e ley ta aplicabel riba tur hende. “Kier men no ta bay tin necesidad pa un decision ehecutivo den un caso cu no ta haciele boluntariamente” Wever a contesta e portal aki. Esey kier men cu e por bira un caso interesante mirando cu di un banda ta bisa cu no por cambia e contracto sin mas, pero di otro banda ta bisa cu ora cu e bira un ley, e persona lo tin cu atende su mes na esaki.