Implementacion di CroesWever norm por encontra retonan legal

ORANJESTAD – E decision di gobierno di Aruba pa aplica un norma nobo pa regula salario di director di companianan estatal di gobierno, - e asina yama ‘Wever-Croes Norm’ -, den forma definitivo manera anuncia recientemente, por conta cu hopi contratiempo legal. E norma ta uno similar cu Hulanda a introduci na 2006, e asina yama Balkenende Norm (salario di un director di un compania por ta 130% di salario di prome minister di e pais respectivo). Sinembargo, tin un diferencia importante di nos ley di labor compara cu esun di Hulanda, cu ta cu nos ley no ta permiti cambio unilateral door di e doño di  trabou. Riba un pregunta recien di noticiacla na e premier, el a confirma cu enberdad esaki ta un posibilidad y cu e no ta aplicabel pa tur director. 

CARTA

Den un carta pa comisario y director di como 20 companianan estatal di gobierno, prome minister Evelyn Wever a haci un ‘apelacion’ riba e ‘obligacion moral’ riba e aspecto di solidaridad pa aplica e mesun reduccion den salario y aspecto secundario manera cu gobierno a aplica pa nan mes, ambtenaar y tambe pensionadonan. Esey riba su mes, lo no mester ta un problema, mirando cu ta den crisis y cu tur hende mester entrega. E problema ta bin den e parti cu ta haci mencion di e maneho general nobo di e norma nobo riba e asina yama ‘salarionan top’, esta esnan mas halto. No ta specifica den e carta si, si ta trata di solamente e salario y beneficio di e directornan (statutorio) of tambe otro directornan den e respectivo empresanan. Cu e parti di e norma aki, e mandatario por contrae pues retonan legal cu por haci e caso mas ‘dificil’, segun un investigacion cu e portal aki a haci. 

SITUACION

Investigacion cu e portal aki a haci ta mustra cu contrario na Aruba, na Hulanda tin un asina yama “eenzijdig wijzigingsbeding” (cambio unilateral di un clausula) unda cu si ta permiti pa haci e cambio unilateral. Aunke pa hasi uso di dje mester tin un “redelijkheidstoets” (prueba di razonabilidad) basta fuerte. Pesey por bisa cu cerca nos (Aruba) ta mas dificil cu na Hulanda pa introduci cambionan sin consensus di e trahador.

POSIBILIDAD

Asina mes, tin posibilidad cu partidonan por yega na un acuerdo. Esaki, ora cu segun e regla di redelijkheid en billijkheid y principionan di e asina yama ‘goed werknemerschap’ y ‘goed werkgeverschap’ (bon practica laboral) ta un base pa purba introduci tal cambionan. Ademas, tur dos partido mester ta di acuerdo cu e cambio aki y cu e ta rasonabel pa ambos. Gobierno mester por ofrece un posibilidad husto, y e director en cuestion mester considera esaki y wak si e ta rasonabel y bou di circumstancia, realisabel. Si partidonan no por haya otro, un huez lo mester por dicidi esaki manera a sosode den pasado. Den pasado gobiernonan a purba retira algun director di nv di gobierno y no a logra y a bay para dilanti di huez. 

CRISIS

Tambe mester tene na cuenta cu den situacion di crisis, gobierno por tin un bon caminda di cana unda cu ta splica e situacion dificil cu tin, y cu ta trata di interes general y cu esaki por tin implicacion grandi pa e pais financieramente di otro forma. Den un caso asina hopi biaha un director no por haci otro y enberdad por bay di acuerdo. Problema sinembargo, ta cu si e ta trata di algo cu no ta cambia despues di e crisis (pues algo temporal) y ta bira asina, un situacion permanente. Den un caso di crisis, un director por bay di acuerdo pero asina e crisis pasa, lo mester bay bek na e condicion di trabou conforme contract. Y aki ta unda cu gobierno lo por spera problema legal. Y si ta trata di impone esaki pa directornan nobo so, e lo por tin un efecto no deseabel pasobra pa aworaki, directornan lo sea no retira of lo por wordo retira obligatoriamente cu consecuencia cu e por bay termina den un otro caso legal.