Merca tin su prome cacho cu a test positivo pa COVID-19

CHAPEL HILL – Un cacho di rasa ‘pug’ den estado Mericano di North Carolina, a test positivo pa coronavirus, cu por ta e prome caso pa un cacho na Merca. E cacho, Winston, tabata parti di un estudio di Duke University, den cual henter un famia na Chapel Hill, e famia McClean, a test pa e virus. E mama, tata, yiu homber y e pug a test positivo, mientras cu e  yiu muher, un otro cacho y un pushi a test negativo, segun e filial di NBC News, WRAL na Raleigh, North Carolina. E cacho tabatin simptoma leve. Pugs ta un poco inusual, den sentido cu nan ta niester y tosa den un forma hopi diferente. E ta casi parse cu e ta bira ‘duizelig’ y tin dia cu e no kier come. Y pugs ta conoci di gusta come hopi. Segun e yiu homber, e cacho a haya e virus pasobra e gusta lembe tur e tayonan di e famia y ta drumi den e cama di su mama (di e yiu homber). 

Mientras cu Winston ta e prome cacho na Merca cu ta haya coronavirus,  un cacho na Hong Kong a muri di coronavirus na maart. Segun e centro di control di malesana contagioso a bisa cu no tin ningun prueba cu bestia ta hunta un papel significativo den plama e virus cu ta causa COVID 19. Pero, ta sugeri pa bo trata nan manera cu bo ta trata bo otro famianan humano.