Aruba a entrega su plan pa subsidio di salario na CAFT pa evaluacion

ORANJESTAD  - Gobierno di Aruba diahuebs ultimo a entrega su plan pa subsidio di salario na CAFT pa evaluacion. Conseho di minister di Reino (RMR) lo dicidi riba esaki diabierna awor. Asina minister di finanza Xiomara Maduro a informa. Manera ta conoci, Reino Hulandes ta brinda yudansa na Aruba den forma di sosten di likidez pa por ehecuta presupuesto 2020. Banda di esaki Conseho di Minister di Reino a pidi Aruba pa entrega un plan pa subsidio di salario pa asina comercio por wordo yuda pa paga salario di su trahadornan y di e manera aki logra conserva cupo di trabou den e periodo di e crisis di COVID19. E plan aki mester wordo presenta na CAFT pa su evaluacion pa asina nan por conseha Conseho di Minister di Reino y pa e organo aki na su turno por tuma un decision dia 1 di mei proximo. 

A CONSULTA CU GREMIO LOCAL 

E peticion pa subsidio di salario cu a keda entreg na CAFT pa su evaluacion, a tuma lugar despues cu a haci e calculacionnan necesario y a haci e debido consulta cu gremio comercial ATA, AHATA y Camara di Comercio. Pa 3 siman largo e gremionan comercial a haya oportunidad pa por a participa na e formulacion di e condicionnan general bou cual Gobierno ta ofrece e subsidio di salario.

CONDICION GENERAL

Gobierno ta yuda comercio pa paga trahadornan, 80% di e salario bruto inscribi na SVB, cu un maximo di 5850 florin, ora cu tin perdida di minimo 25% di perdida di entrada, pa asina por mantene e trahadornan na trabou. Pa bin na remarca pa e yudansa aki, e compania no mester a kita trahador despues di 15 di maart 2020, mester sigui paga e trahador 100% di su salario, cu excepcion si a yega na otro palabracion di salario, y e subsidio ta wordo paga a base di e informacion di salario cu ta conoci na SVB riba 15 di maart 2020.

MAS INFORMACION LO SIGUI

Gobierno ta trahando awor aki riba e condicionnan y detayes di e yudansa den forma di subsidio di salario, y asina cu e informacIon aki ta conoci lo comparti e informacion.