Avion a yega Aruba pa hiba e mediconan Mericano bek

ORANJESTAD – E avion charter di Swift Air a yega for di Miami awe (diasabra) mainta pa busca e 21 Mericanonan cu a bin Aruba algun dia prome pa duna asistencia na nos hospital relaciona cu coronavirus. Manera ta conoci, diabierna a bira conoci cu un di e personanan na Corsou a resulta di ta contagia cu e virus. Hulanda (cu ta paga esaki) a dicidi e ora diabierna cu ta manda tanto e grupo di Corsou y Aruba bek pa Miami mesora y busca un otro grupo, envez di laga e grupo actual keda su duracion di 90 dia inicialmente planea. Awe mainta tempran pues e avion a yega cu mester busca nan bek. For di Aruba, e avion ta sali pa Corsou pa busca e grupo ey y sigui pa Miami. 

DATOS

E avion (buelo WQ9701) a yega Aruba awe mainta 9:39am y a para dilanti, pero no a pega na e slurf. A busca un trapi pa asina pasa e grupo di otro forma. E avion di matricula N624XA ta di e aeroliña iAero Airways y ta wordo opera awor pa Swift Air. Mester bisa cu diahuebs ora cu e avion a yega Aruba, esaki a bin for di Corsou, pues riba e mesun buelo cu tabatin esun contagia caba. Na Aruba ora cu nan a yega, a bay den cuarentena obligatorio mesora di 14 dia, y a test na Aruba pa coronavirus pero a sali negativo. Asina mes a opta pa manda nan tur bek Miami. 

E GRUPO

E grupo di 21 enfermero Mericano cu a yega Aruba diahuebs, ta forma parti di e compania AMI Expeditionary Healthcare, miho conoci como Aspen Medical International AMI. Nan ta prove servicio medico na instancia internacional. Y e grupo aki a keda contrata pa Hulanda pa haci esaki pa Aruba. Nan ta consisti di medico y enfermeronan registra y specialisa den cuido intensivo y calamidad a yega for di Merca pa sostene y reinforsa Hospital pa amplia e capacidad di cuido pa asina hospital por normalisa su cuido regular bek. E asistencia di e profesionalnan aki for di Merca tur ta forma parti di e pakete total di ayudo cu a wordo manda via hulanda pa Aruba y e otro islanan.