Decision a cay: Gobierno ta duna 20% y trahado publico 12.6% di salario

ORANJESTAD – Decision a cay di gobierno pa manda e plan pa Hulanda, cu ta inclui e proposicion haci na sindicato pa reduccion di salario manera a keda proponi. Esaki ta nifica cu gobierno (minister y parlamentarionan) ta duna 20% y trahado publico 12.6%. Asina prome minister Evelyn Wever a anuncia diabierna anochi durante briefing riba coronavirus. E ta acepta cu el a tuma e decision sin tin un consensus cu sindicatonan, pero no por a warda mas y lo asumi tur consecuencia di esaki.  

E DEAL

E deal cu Wever a dicidi ariba unilaterlamente, ta uno unda cu gobierno ta reduci nan salario y beneficio total cu 20% y e trahado publico 12.6%. Sindicatonan tabata kier pa gobierno entrega mas, pero partidonan no a logra haya otro ainda. Y mirando cu tin un ‘deadline’ di 1 di mei 2020 poni pa Hulanda, a opta pa tuma e decision numa, pa asina sigura cu gobierno ta na tempo pa keda cla segun peticion di Hulanda. Cu e placa cu lo haya, por garantisa e salario di trahadonan publico pa e proximo simanan y luna. 

REUNION PARLAMENTARIO

Tabatin un reunion publico diabierna merdia entre Parlamento y sindicatonan riba e tema di entrega di salario. Durante e reunion, Parlamento a confirma na e sindicatonan cu lo entrega 20%, y sindicatonan a acepta esey pero cu nan lo kier pa gobierno entrega mas ainda. A keda cu lo reuni otro siman pa pasa e cambio di salario temporal den un reunion siguiente. No ta conoci kico sindicatonan ta bisa di e decision di gobierno manera anuncia diabierna anochi.