Registro pa FASE a trece hopi ‘iregularidad’ laboral na claridad

ORANJESTAD – E registro pa ayudo financiero conoci como FASE, a trece hopi cos na claridad, cu ta rekeri atencion. Segun minister di Economia Xiomara Maduro a splica diabierna anochi durante e briefing riba coronavirus, cu e fayonan aki ta stroba un persona di registra exitosamente pa haya ayudo. Entre nan carta di doño di trabou sin firma, hende cu permiso venci, falta di payslip y mas. 

PROBLEMA

Segun Maduro, hopi cos pues a keda mustra cu ta bayendo malo y cu ta ‘ilegal’ den e casonan aki. Mientras cu e mandatario no a indica cu ta trata di abuso, e realidad ta cu basa riba informacion, por deduci cu abuso a tuma lugar. Entre nan, hendenan cu a perde trabou prome cu covid19 a cuminsa, pues no ta bin na remarke pa esaki. Tambe tin cu nan permiso a keda caduca y como tal no ta legal mas. Falta di payslip tambe ta un fayo cu ta ripiti hopi. Hopi no ta inscribe na SVB pero si a pidi ayudo. Esaki ta nifica cu nan ta traha ‘zwart’, pues ilegal. Cu esaki, ta resalta cu tin hopi cos cu no ta corecto den e mundo laboral, cu ta pone cu tin trabou pa haci.