Rey a papia cu gobernador riba e crisis di coronavirus

DEN HAAG/ORANJESTAD- Su Mahestad e Rey a combersa, den yamada di telefon separa, cu e gobernadornan di e tres paisnan di e parti Caribense di Reino riba diahuebs 23 di april. Gobernador Boekhoudt di Aruba, Gobernador George-Wout di Corsou y Gobernador Holiday di Sint Maarten a informa e Rey tocante e situacion na nan pais debi na e coronavirus (COVID-19) y e consecuencianan di e medidanan tuma pa preveni plamamento di e virus. 

Rey Willem-Alexander a expresa su apoyo na e gobernadornan y e pueblo di e tres islanan. Ademas, e Rey tin un gran aprecio pa e manera con e trahadonan di cuido y otro personanan involvi ta enfrenta e crisis dia y nochi. E Rey a haci esaki tambe den nomber di Reina Máxima. Aruba, Corsou y Sint Maarten ta, tanto medicamente como economicamente y socialmente, gravemente afecta door di e brote di coronavirus.

Riba diabierna 3 di april, e Rey a participa na e video conferencia diario entre e VWS team di crisis Caribe Hulandes y e teamnan na Bonaire y Sint Eustatius. E combersacion aki tabata parti di e bishita di trabou na e Ministerio di Salud Publico, Bienestar y Deporte (VWS) (RVD-comunicado di prensa number 64). E Rey tambe a expresa su apoyo y aprecio pa e islanan BES e momento ey.

 Pa medio di e combersacionnan telefonico y si ta posibel, bishitanan di trabou, Rey Willem-Alexander y Reina Máxima ta informa nan mes tocante e consecuencianan di e brote di coronavirus y ta expresa nan apoyo y aprecio pa e esfuerso di hopi persona den e lucha contra e pandemia.