Polis lo sigui kita adictonan ambulante cu molestia, for di caya

ORANJESTAD – Si un adicto ambulante haci molester, polis lo bay cune. “Si bo ta molestia hende, horta nan, nos ta molestia abo” minister di husticia Arthur Dowers a bisa NoticiaCla.com. Manera palabra den siman, Dowers a bishita algun di e areanan unda ta sintiendo e efectonan negativo cu concentracion di adictonan ambulante ta causando. Riba diahuebs e Mandatario a bay cu un team di Serlimar pa haci e area limpi y personal di Fundacion Elizier, cual ta traha riba tereno di rehabilitacion y “nazorg” di adicto. Na e ocasion ey a dicidi di bay cu un adicto, pasobra cu e tabata den un condicion hopi malo, bao di condicionnan cu simplemente “no por”. Polis a bay cune y lo cuminsa un proceso pa determina con pa yuda e hoben aki.

Riba esaki NoticiaCla.com a puntra e mandatario si esaki ta un maneho cu e lo hiba awor. E mandatario a bisa cu nan lo sigui cu esaki. Pero tambe cu a palabra cu e fundacion cu nan lo haci intentonan pa haya e adictonan acepta pa tuma tratamento boluntariamente y a atende tambe cu e departamento di “onder curatelestelling” pa percura y atende cu e adictonan cu no ta acepta e oferta pa tratamento boluntariamente. “ Si bo no bay, nos ta hibabo” Dowers a sigura NoticiaCla.com.

Tambe a papia cu un otro adicto y ofrece tratamento. Minister a splica cu cerca e persona aki ta bisto cu tin problema mental y si e no bay boluntariamente pa tratamento, e mes lo emiti un ordo pa e wordo tuma den tratamento.

“Banda di esey nos lo bay tambe mira con lo bay atende cu e otro gruponan cu ta riba caya. Pasobra manera boso mes por a mira tin hopi, nan ta aglomera hopi sushi, hopi cosnan cu no ta bon. Nos a ruim op tur esey y instruccion na polis ta pa cada tanto rato nan pasa tira bista si nan ta eynan y percura pa nan no por permanece riba tereno publico of tereno priva,” Dowers a bisa.

E adictonan ambulante ta molestia hende, ta horta den auto, den cas y negoshi y aunke ta un “lange adem” pa resolve e problematica aki, no tin espacio pa “give up”, Minister Arthur Dowers a subraya. El a añadi cu lo sigui move den e area, lo sigui haci limpi, lo sigui papia cu e adictonan ambulante pa na acepta tratamento y lo sigui haci tur esfuerso te ora cu nan mes compronde cu loke ta pasando y loke nan ta haciendo no ta aceptabel.

Dowers a expresa cu ta pidiendo cooperacion di e famianan di e adictonan pa cu pone e adictonan bao di curatela y pa yuda esunnan cu problema psikiatrico pa wordo interna den un facilidad unda nan ta haya asistencia. Pa cu a adictonan cu no tin famia cu por of ta dispuesto pa atende cu nan, “nos mes lo bay atende cu nan,” e minister a bisa.

E titular di husticia a indica bon cla cu e problematica di adicto ambulante/choller ta tuma esfuersonan serio di parti di diferente grupo di interes y instancia y esaki ta inclui e comerciantenan mes. E mandatario a haci un apelacion fuerte na comerciantenan den centro di Oranjestad, den Caya Betico Croes y e area rond di dje cu un concentracion di actividad comercial pa nan cooperacion.

No ta solamente e choller ta produci sushi, pero tambe e tiendanan y otro negoshinan y mester percura pa e desperdicio wordo deshaci di dje na un forma responsabel, Minister Dowers a subraya. El a pidi pa no laga of paga chollernan pa tira sushi afo sin supervision, pasobra nan ta tir’e riba tereno publico y ta causa extra molester pa tur hende, tanto cliente, como empleadonan y e negoshinan mes. Ademas, el a agrega, pa tampoco laga e paletnan cu a bin cu carga unda cu ta benta, pasobra e adictonan ambulante ta coy esakinan y ta traha luganan pa nan drumi unda cu ta, treciendo mas sushedad y molester. E minister a comenta cu nan ta spera di haya cooperacion mas estrecho cu comercio y cu comercio lo avisa nan tambe pa nan por actua y tuma pasonan pa cu prevencion y no lo tin mester mas den futuro pa cada biaha mobilisa teamnan grandi pa haci limpiesa mas.